गुहागर (वार्ताहर) :

गुहागर तालुक्यातील वरवेली येथील ज्येष्ठ सामाजिक कार्यकर्ते अरुण भुवड यांनी आपल्या सुकन्या कु. श्रिया व कु. स्वेतिका (इयत्ता सहावी) यांच्या १२ व्या वाढदिवसानिमित्त एक आदर्श उपक्रम राबविला. वरवेली पूर्ण प्राथमिक शाळेतील विद्यार्थ्यांना ज्ञानप्रबोधनपर सुमारे ५५ पुस्तकांचे वाटप करून त्यांनी वाढदिवस सामाजिक बांधिलकीने साजरा केला.

या छोटेखानी कार्यक्रमाचे आयोजन शाळेचे मुख्याध्यापक श्री. बोलभट्ट यांच्या मार्गदर्शनाखाली करण्यात आले. कार्यक्रमाला शिक्षकवर्ग, ग्रामस्थ तसेच इतर मान्यवर उपस्थित होते. यावेळी विद्यार्थ्यांना सामाजिक, ऐतिहासिक आणि शैक्षणिक मूल्ये वाढवणारी विविध अभ्यासपुस्तके देण्यात आली.

शाळेतील सुमारे ५५ विद्यार्थ्यांना ही पुस्तके देण्यात आली असून विद्यार्थ्यांमध्ये वाचनाची आवड वाढावी आणि ज्ञानाचा प्रसार व्हावा हा या उपक्रमामागील मुख्य उद्देश असल्याचे सांगण्यात आले.

कार्यक्रम यशस्वीपणे पार पाडण्यासाठी शाळेने दिलेल्या सहकार्याबद्दल भुवड परिवाराने आभार व्यक्त केले. यावेळी उपस्थित पालक, शिक्षक व ग्रामस्थांनी कु. श्रिया आणि कु. स्वेतिका यांना वाढदिवसाच्या हार्दिक शुभेच्छा दिल्या.

सामाजिक बांधिलकी जपत वाढदिवस साजरा करण्याच्या या उपक्रमाचे परिसरातील नागरिकांकडून मोठ्या प्रमाणात कौतुक करण्यात येत आहे.