रत्नागिरी | प्रतिनिधी :

रत्नागिरी शहरातील हिंदू कॉलनी परिसरात गुरुवारी सकाळी धक्कादायक चेन स्नॅचिंगची घटना घडली. दुचाकीवरून आलेल्या दोन अज्ञात चोरट्यांनी पत्ता विचारण्याच्या बहाण्याने एका तरुणाच्या गळ्यातील सोन्याची चेन हिसकावून पळ काढला. ही संपूर्ण घटना परिसरातील सीसीटीव्ही कॅमेऱ्यात कैद झाली आहे.

मिळालेल्या माहितीनुसार, हिंदू कॉलनीतील रहिवासी कांचन जैन गुरुवारी सकाळी सुमारे ८:१५ वाजता घराजवळ उभे असताना दुचाकीवरून आलेल्या दोन तरुणांनी त्यांना पत्ता विचारला. जैन काही समजून घेण्याआधीच मागे बसलेल्या आरोपीने त्यांच्या गळ्यातील सोन्याची साखळी हिसकावली आणि दोघेही तात्काळ दुचाकीवरून फरार झाले.

घटनेची माहिती मिळताच पोलिसांनी घटनास्थळी धाव घेत पंचनामा केला. तसेच परिसरातील सीसीटीव्ही फुटेज तपासले असता आरोपींचे स्पष्ट चित्र समोर आले असून, त्यावरून तपासाची दिशा निश्चित करण्यात येत आहे.

प्राथमिक तपासात चोरीसाठी वापरलेली दुचाकी काळ्या रंगाची असल्याचे समोर आले आहे. आरोपी दोघेही सडपातळ बांध्याचे असून, त्यापैकी एकाने तोंडावर रुमाल बांधलेला होता, तर दुसरा उंचीने अधिक असल्याचे दिसून आले. दोघेही मराठी भाषेत संवाद साधत असल्याची माहिती पोलिसांनी दिली आहे.

या घटनेमुळे परिसरात भीतीचे वातावरण निर्माण झाले असून, नागरिकांनी सतर्क राहण्याचे आवाहन पोलिसांनी केले आहे. आरोपींचा शोध सुरू असून, लवकरच त्यांना अटक केली जाईल, असा विश्वास पोलिसांनी व्यक्त केला आहे.