संगमेश्वर : आंबा घाटात घडलेल्या धाडसी दरोड्याच्या प्रकरणात देवरूख पोलिसांनी आणखी दोन आरोपींना अटक करण्यात यश मिळवले आहे. या कारवाईनंतर आतापर्यंत एकूण आठपैकी सात आरोपींना अटक करण्यात आली असून एक आरोपी अद्याप फरार आहे.

घटनेच्या काही तासांतच देवरूख पोलिसांनी वरिष्ठ अधिकाऱ्यांच्या मार्गदर्शनाखाली वेगाने तपास सुरू करत पाच आरोपींना अटक केली होती. त्यानंतर उर्वरित फरार आरोपींचा शोध सुरूच होता. शुक्रवारी रत्नागिरी परिसरातून आणखी दोन आरोपींना ताब्यात घेण्यात आले.

अटक करण्यात आलेल्या आरोपींची नावे अरबाज मजीद बांगी (वय ३१, रा. मजगाव, रत्नागिरी) आणि शार्दुल सुनील किर (वय २४, रा. सोमेश्वर, रत्नागिरी) अशी आहेत. दोघांनाही देवरूख न्यायालयात हजर केले असता न्यायालयाने त्यांना ४ दिवसांची पोलीस कोठडी सुनावली आहे.

या प्रकरणातील मुख्य घटनेनुसार, कोल्हापूर जिल्ह्यातील शाहूवाडी येथील प्रथमेश तानाजी दळवी हे बुधवारी सायंकाळी रत्नागिरीतील वेतोशी येथून बोलेरो गाडीत म्हैस घेऊन कोल्हापूरकडे जात होते. रात्री सुमारे ८.३० वाजता आंबा घाटातील दख्खन परिसरात पांढऱ्या रंगाची थार आणि भारत सरकारचा लोगो असलेली इनोव्हा अशा दोन गाड्यांतून आलेल्या आठ जणांनी त्यांची गाडी अडवली.

आरोपींनी दळवी यांना गाडीतून खाली ओढून मारहाण केली, चाकूचा धाक दाखवत त्यांना जबरदस्तीने इनोव्हा गाडीत बसवले. त्यानंतर साखरपा येथील गद्रे पेट्रोल पंप परिसरात नेऊन त्यांच्याकडून ५० हजार रुपयांची मागणी करण्यात आली. तसेच गाडीतील २५ हजार रुपये जबरदस्तीने काढून घेण्यात आले. ‘पोलीसांत तक्रार केली तर परिणाम वाईट होतील’ अशी धमकी देत आरोपी फरार झाले होते.

घटनेची गंभीर दखल घेत रत्नागिरीचे पोलीस अधीक्षक नितीन बगाटे, अपर पोलीस अधीक्षक बी. बी. महामुनी आणि लांजा उपविभागीय पोलीस अधिकारी सुरेश कदम यांच्या मार्गदर्शनाखाली पोलीस निरीक्षक उदय झावरे यांनी तपास पथके तयार करून कारवाई सुरू केली.

पोलिसांनी आतापर्यंत सात आरोपींना अटक केली असून उर्वरित एक फरार आरोपीचा शोध सुरू आहे. लवकरच त्यालाही ताब्यात घेण्यात येईल, अशी माहिती देवरूख पोलिसांनी दिली आहे.