चिपळूण (प्रतिनिधी): उन्हाळी सुट्टीच्या पार्श्वभूमीवर कोकण रेल्वे मार्गावरील प्रवाशांची वाढती गर्दी लक्षात घेऊन चिपळूण–दिवा दरम्यान विशेष अनारक्षित मेमू गाड्या चालविण्यात येणार आहेत. या विशेष गाड्या १ मे २०२६ ते ७ जून २०२६ या कालावधीत दर शुक्रवारी, शनिवारी आणि रविवारी धावणार आहेत.

रेल्वे प्रशासनाने दिलेल्या माहितीनुसार, गाडी क्रमांक ०११६० चिपळूण–दिवा मेमू विशेष दुपारी ३:३० वाजता चिपळूण स्थानकातून सुटेल आणि रात्री ११:१० वाजता दिवा येथे पोहोचेल. तर गाडी क्रमांक ०११५९ दिवा–चिपळूण मेमू विशेष रात्री ११:२५ वाजता दिवा येथून सुटून दुसऱ्या दिवशी सकाळी ६:३० वाजता चिपळूण येथे पोहोचणार आहे.

ही गाडी मार्गातील महत्त्वाच्या स्थानकांवर थांबा घेणार आहे. त्यामध्ये अंजनी, खेड, कळंबणी बुद्रुक, दिवाणखवटी, विन्हेरे, करंजाडी, सापे-वामने, वीर, गोरेगाव रोड, माणगाव, इंदापूर, कोलाड, रोहा, नागोठणे, कासू, पेण, जिते, आपटा, सोमटणे, पनवेल, कळंबोली, तळोजा पांचनंद आणि निळजे या स्थानकांचा समावेश आहे.

उन्हाळी हंगामात कोकण व मुंबई दरम्यान प्रवाशांची वाढती गर्दी लक्षात घेता ही विशेष सेवा अत्यंत उपयुक्त ठरणार असून प्रवाशांना मोठा दिलासा मिळणार आहे.