चिपळूण : भरधाव वेगात असलेल्या आयशर ट्रकने मुरादपूर रेल्वे स्टेशन रोडवरील महावितरणच्या दोन वीज खांबांना जोरदार धडक दिल्याची घटना घडली आहे. या अपघातात महावितरणचे सुमारे ४० हजार रुपयांचे नुकसान झाले असून ट्रक चालक घटनास्थळावरून पसार झाल्याने खळबळ उडाली आहे.

ही घटना २६ एप्रिल रोजी सकाळी सुमारे ७:३० वाजण्याच्या सुमारास मुरादपूर अंतर्गत रोडवरील हरिविश्व अपार्टमेंटसमोर घडली. आरोपी चालक किरण कृष्णा गडकरी (वय ४०, रा. पुणे) हा आयशर कंपनीचा प्रो एक्स मॉडेल ट्रक (एम.एच.१२ झेड ई ४२२३) घेऊन जात असताना वाहनावरील नियंत्रण सुटल्याने ही दुर्घटना घडली.

ट्रकने रस्त्याच्या कडेला असलेल्या महावितरणच्या मेन लाईन पोल आणि एलटी पोलला जोरदार धडक दिली. या धडकेत दोन्ही खांबांचे मोठे नुकसान झाले असून परिसरातील विद्युत पुरवठा काही काळासाठी बाधित झाला होता. ट्रकचेही मोठे नुकसान झाले आहे.

अपघातानंतर चालकाने कोणतीही माहिती न देता किंवा मदत न मागता घटनास्थळावरून ट्रक घेऊन पलायन केल्याचे समोर आले आहे.

⚖️ पोलिसांत गुन्हा दाखल

महावितरणचे सहाय्यक अभियंता सचिन कोळेकर यांनी चिपळूण पोलीस ठाण्यात फिर्याद दाखल केली आहे. त्यानुसार आरोपी चालकाविरुद्ध भारतीय न्यायसंहिता आणि सार्वजनिक मालमत्तेचे नुकसान प्रतिबंधक कायद्यांतर्गत गुन्हा दाखल करण्यात आला आहे.

🚔 पुढील तपास सुरू

चिपळूण पोलीस या प्रकरणाचा अधिक तपास करत असून फरार चालकाचा शोध सुरू आहे.