​दापोली (प्रतिनिधी):

दापोली तालुक्यातील साकुर्डे बौद्धवाडी येथील एका चिरेखाणीवर अज्ञात चोरट्यांनी डल्ला मारत सुमारे ६० हजार रुपये किमतीची थ्रीफेज कॉपर वायर चोरून नेल्याची घटना उघडकीस आली आहे. याप्रकरणी दापोली पोलीस ठाण्यात तक्रार दाखल करण्यात आली आहे.

​नेमकी घटना काय?

​मिळालेल्या माहितीनुसार, फिर्यादी प्रवीण सहदेव मर्चंडे (वय ४६, रा. साकुर्डे बौद्धवाडी) यांची ‘गोरजाईचा कातळ’ भागात स्वतःची चिरेखाण आहे. २९ एप्रिल २०२६ रोजी सायंकाळी चिरे कटिंग मशीनमध्ये बिघाड झाल्याने मर्चंडे यांनी ते दुरुस्त करून घेतले होते. रात्री ११ वाजेच्या सुमारास मशीनला थ्रीफेज कॉपर वायर जोडून, मशीन व्यवस्थित सुरू असल्याची खात्री करून ते घरी गेले होते.

​चोरीचा प्रकार असा आला उघड

​३० एप्रिल रोजी सकाळी ६:३० वाजता चिरेखाणीवरील मुकादम मनोज राठोड हे कामावर गेले असता, त्यांना मशीनला जोडलेली वायर दिसून आली नाही. त्यांनी तात्काळ या घटनेची माहिती मालक प्रवीण मर्चंडे यांना दिली. मर्चंडे यांनी घटनास्थळी धाव घेत पाहणी केली असता, चिरे कटिंग मशीन आणि पॉवर टिलरला असलेली साधारण १०० मीटर लांबीची आणि ६० हजार रुपये किमतीची काळ्या रंगाची कॉपर वायर अज्ञात चोरट्यांनी कापून चोरून नेल्याचे स्पष्ट झाले.

​पोलीस तपास सुरू

​या चोरीप्रकरणी प्रवीण मर्चंडे यांनी दापोली पोलीस ठाण्यात रीतसर जबाब नोंदवला असून, पोलिसांनी अज्ञात चोरट्याविरुद्ध गुन्हा दाखल केला आहे. २९ एप्रिलच्या रात्री ११ ते ३० एप्रिलच्या सकाळी ६ या दरम्यान ही चोरी झाल्याचा प्राथमिक अंदाज आहे. दापोली पोलीस या प्रकरणाचा अधिक तपास करत आहेत.