नवी दिल्ली: काँग्रेस नेते आणि लोकसभेतील विरोधी पक्षनेते राहुल गांधी यांनी पंतप्रधान नरेंद्र मोदी यांच्यावर पुन्हा एकदा घणाघाती टीका केली आहे. मध्य प्रदेशातील भोपाळ येथे आयोजित ‘किसान महा-चौपाल’मध्ये बोलताना राहुल गांधी यांनी भारत-अमेरिका व्यापार करार (Trade Deal) आणि चीनसोबतच्या सीमा वादाच्या मुद्द्यावरून सरकारला धारेवर धरले. “पंतप्रधान मोदींमध्ये हिंमत असेल, तर त्यांनी अमेरिकेसोबत झालेला हा अन्यायकारक व्यापार करार रद्द करून दाखवावा,” असे जाहीर आव्हान त्यांनी यावेळी दिले.

राहुल गांधी यांनी आपल्या भाषणात आरोप केला की, भारत आणि अमेरिका यांच्यातील हा करार गेल्या चार महिन्यांपासून रखडला होता, कारण भारतीय शेतकरी आणि कृषी क्षेत्राचे हित धोक्यात होते. मात्र, माझ्या संसदेतील भाषणानंतर घाबरलेल्या पंतप्रधानांनी आपल्या मंत्रिमंडळाची परवानगी न घेता थेट अमेरिकेचे राष्ट्राध्यक्ष डोनाल्ड ट्रम्प यांना फोन केला आणि हा करार निश्चित केला. या करारामुळे भारतीय कापूस, सोयाबीन आणि मका उत्पादक शेतकऱ्यांचे प्रचंड नुकसान होणार असून, हा देशहिताशी केलेला मोठा विश्वासघात आहे, अशी टीका त्यांनी केली.

सीमा वादावर भाष्य करताना राहुल गांधी यांनी माजी लष्करप्रमुख जनरल मनोज नरवणे यांच्या पुस्तकाचा संदर्भ दिला. चीनचे रणगाडे भारतीय हद्दीत घुसलेले असताना लष्करप्रमुखांना दिल्लीतून कोणतेही स्पष्ट आदेश मिळत नव्हते. पंतप्रधान मोदींनी त्या संकटाच्या काळात लष्कराला एकटे सोडले आणि चीनच्या घुसखोरीवर आजही ते मौन बाळगून आहेत, असा गंभीर आरोप राहुल गांधींनी केला. संसदेत जेव्हा मी हा मुद्दा मांडण्याचा प्रयत्न केला, तेव्हा मला बोलण्यापासून रोखण्यात आले, असेही त्यांनी नमूद केले.

पंतप्रधान मोदी ‘कॉम्प्रोमाईज्ड’ (तडजोड केलेले) नेते आहेत आणि ते पुन्हा एकदा अमेरिकेसमोर शरणागती पत्करतील, असा दावा राहुल गांधी यांनी आपल्या भाषणात केला. अमेरिकेच्या सर्वोच्च न्यायालयाने ट्रम्प यांच्या टॅरिफ धोरणाबाबत दिलेल्या निर्णयानंतर आता भारताने आपली भूमिका ठामपणे मांडायला हवी, परंतु हे सरकार केवळ मोठ्या कॉर्पोरेट कंपन्यांच्या हितासाठी काम करत असल्याचा टोला त्यांनी लगावला.