दापोली (प्रतिनिधी) : दापोली तालुक्यातील तेरेवायंगणी येथील जंगलमय भागात एका २९ वर्षीय तरुणाने झाडाला गळफास घेऊन आत्महत्या केल्याची धक्कादायक घटना उघडकीस आली आहे. या घटनेमुळे परिसरात हळहळ व्यक्त होत आहे.

मिळालेल्या माहितीनुसार, सुमित मधुकर मोहिते (वय २९, रा. तेरेवायंगणी बौद्धवाडी, ता. दापोली) हा दिनांक २८ फेब्रुवारी २०२६ रोजी सकाळी ७ वाजण्याच्या सुमारास “मी चंद्रनगर येथे कामाला जातो,” असे सांगून घरातून बाहेर पडला होता. मात्र तो परत न आल्याने कुटुंबीयांनी परिसरात तसेच नातेवाईकांकडे शोधाशोध सुरू केली.

दरम्यान, मौजे तेरेवायंगणी येथील पाखर जंगल परिसरात केवस जातीच्या झाडाला नायलॉन दोरीच्या साहाय्याने गळफास घेतलेल्या अवस्थेत त्याचा मृतदेह आढळून आला. ही माहिती समजताच ग्रामस्थांनी तात्काळ पोलिसांना कळविले.

या प्रकरणी आमृत क्रमांक २१/२०२६ बी.एन.एस.एस. कलम १९४ प्रमाणे नोंद करण्यात आली असून पुढील तपास दापोली पोलीस करीत आहेत. आत्महत्येमागील नेमके कारण अद्याप स्पष्ट झालेले नाही.

घटनेमुळे तेरेवायंगणी परिसरात शोककळा पसरली आहे.