Ratnagiri Zilla Parishad

Ratnagiri ZP Election 2026

Ratnagiri ZP President Election

Ratnagiri ZP Vice President Election

Ratnagiri News

Zilla Parishad Election Maharashtra

Ratnagiri Politics News

Maharashtra ZP Election

Zilla Parishad Ratnagiri

Ratnagiri District News

प्रतिनिधी – रत्नागिरी

रत्नागिरी जिल्हा परिषद अध्यक्ष व उपाध्यक्ष पदासाठीची निवडणूक सोमवार, दि. १६ मार्च २०२६ रोजी दुपारी ३ वाजता जिल्हा परिषद सभागृहात होणार आहे. याबाबत उपजिल्हाधिकारी (सामान्य प्रशासन) विश्वजित गाताडे यांनी अधिकृत आदेश जारी केला आहे.

महाराष्ट्र जिल्हा परिषद व पंचायत समित्या अधिनियम, १९६१ मधील तरतुदीनुसार जिल्हा परिषदेच्या नवनिर्वाचित सदस्यांची पहिली विशेष सभा बोलावण्यात आली असून या सभेमध्ये अध्यक्ष व उपाध्यक्ष पदासाठी निवडणूक प्रक्रिया पार पडणार आहे. ही विशेष सभा जिल्हा परिषदेच्या हिंदूहृदयसम्राट श्रीमान बाळासाहेब ठाकरे जिल्हा परिषद सभागृहात आयोजित करण्यात आली आहे.

अधिनियमाच्या कलम ४५ (२) नुसार या निवडणुकीसाठी पिठासन अधिकारी म्हणून अपर जिल्हाधिकारी यांची नियुक्ती करण्यात आली आहे. त्यांच्या अध्यक्षतेखाली ही निवडणूक प्रक्रिया पार पडणार आहे.

दरम्यान, जिल्हा परिषद तसेच जिल्ह्यातील सर्व नऊ पंचायत समित्यांच्या निवडणुका यापूर्वी यशस्वीपणे पूर्ण झाल्या असून महाराष्ट्र जिल्हा परिषद व पंचायत समित्या अधिनियम, १९६२ च्या कलम ६६ नुसार नवनिर्वाचित सदस्यांची नावे दि. ११ फेब्रुवारी २०२६ रोजी अधिकृतरीत्या प्रसिद्ध करण्यात आली आहेत.

या पार्श्वभूमीवर अधिनियमातील तरतुदीनुसार नवनिर्वाचित सदस्यांच्या पहिल्या विशेष सभेमध्ये जिल्हा परिषद अध्यक्ष व उपाध्यक्ष यांची निवड करणे बंधनकारक असल्याने दि. १६ मार्च रोजी होणाऱ्या या निवडणुकीकडे जिल्ह्यातील राजकीय वर्तुळाचे लक्ष लागले आहे.