अडूर (ता. गुहागर) येथे पारंपरिक संकासुर सोहळ्याचा थरार अनुभवताना भाविक.गुहागर : कोकणातील पारंपरिक शिमगोत्सवाच्या निमित्ताने तालुक्यातील अडूर गावात ग्रामदेवता श्री सुंकाई देवी मंदिर यांच्या होलिकोत्सवातील पेटत्या होमातून धावणाऱ्या संकासुराचा थरार यंदाही हजारो भाविकांच्या उपस्थितीत उत्साहात पार पडला. श्रद्धा, धैर्य आणि लोकपरंपरेचे अनोखे दर्शन घडविणारा हा सोहळा पाहण्यासाठी जिल्हा व परजिल्ह्यातून मोठ्या संख्येने भाविक दाखल झाले होते.

फाल्गुन पंचमीपासून सुरू झालेल्या या उत्सवात चतुःसीमेतील कोंडकारूळ, बोऱ्या, बुधल, पालशेत व नागझरी या गावांमध्ये देवीच्या खेळ्यांची भोवनी पार पडली. त्यानंतर भाटी मैदानावर आयोजित धार्मिक कार्यक्रमात संकासुराने पेटत्या होमाभोवती प्रदक्षिणा घालत भक्तांचा पाठलाग करण्याची पारंपरिक प्रथा सादर केली. होमाला अग्नी दिल्यानंतर संकासुराने ज्वलंत निखाऱ्यांतून धावत उपस्थितांमध्ये थरार निर्माण केला.

या वेळी ‘जय देवी सुंकाई’च्या घोषणांनी परिसर दुमदुमून गेला. संकासुराला चिडवणाऱ्या भक्तांचा तो पेटत्या होमातून पाठलाग करतो आणि पकडल्यावर भक्त त्याचा नमस्कार करून आशीर्वाद घेतात, अशी आगळीवेगळी परंपरा पाहण्यासाठी मुंबई, पुणे तसेच रत्नागिरी जिल्ह्यातील राजापूर ते मंडणगड परिसरातूनही अनेक भाविक आणि युट्यूबर्स उपस्थित होते.

पिढ्यान् पिढ्या सुरू असलेल्या या परंपरेत आजवर कोणतीही अपघाताची घटना घडलेली नसल्याने ग्रामदेवतेवरील श्रद्धा अधिक दृढ होत असल्याचे ग्रामस्थांनी सांगितले. संकासुराचा पारंपरिक वेश, कंबरेतील घुंगरांचा नाद आणि मृदुंग-चकव्याच्या तालावर सादर होणारी लोककला यामुळे कार्यक्रमाला वेगळेच आकर्षण लाभले.

यंदा या सोहळ्याची माहिती सोशल मीडियासह विविध माध्यमांत प्रसिद्ध झाल्याने विक्रमी गर्दी झाली. वाढलेल्या वाहनसंख्येमुळे परिसरात वाहतूक कोंडी झाली, तर मोबाईल नेटवर्कवर ताण आल्याने इंटरनेट सेवा काही काळासाठी ठप्प झाली. काही भाविकांना प्रचंड गर्दीमुळे प्रत्यक्ष संकासुराचा थरार अनुभवता आला नाही.

श्रद्धा, परंपरा आणि सामुदायिक एकोप्याचे प्रतीक असलेला पेटत्या होमातून धावणाऱ्या संकासुराचा हा अनोखा सोहळा यंदाही भक्तिरंगात आणि दिमाखात संपन्न झाला.