वॉशिंग्टन : इराणसोबत सुरू असलेल्या तणावपूर्ण परिस्थितीच्या पार्श्वभूमीवर अमेरिकेचे संरक्षण सचिव पीट हेगसेथ यांनी अत्यंत कठोर आणि आक्रमक भूमिका जाहीर केली आहे. “युद्धात कसलेही फालतू नियम नसतात. लष्कराचे काम लोकशाही निर्माण करणे किंवा समाजसेवा करणे नाही, तर शत्रूला पराभूत करून संपवणे हेच आहे,” असे स्पष्ट शब्दांत त्यांनी अमेरिकेची भूमिका मांडली.

इस्त्राईल-इराण संघर्षावर भाष्य करताना त्यांनी सांगितले की, डोनाल्ड ट्रम्प यांच्या नेतृत्वाखाली अमेरिका कोणत्याही परिस्थितीत मागे हटणार नाही. “जर अमेरिकन नागरिकांवर हल्ला झाला किंवा जगाच्या कुठल्याही कोपऱ्यात त्यांना धमकावले गेले, तर आम्ही कोणतीही माफी न मागता आणि संकोच न बाळगता शत्रूला शोधून त्याचा खात्मा करू,” असा थेट इशारा त्यांनी दिला.

हेगसेथ यांनी पुढे सांगितले की, इराणविरुद्धची कारवाई ही दीर्घकालीन दलदलीत अडकणारी मोहीम नसून, एक निर्णायक लष्करी अभियान आहे. या कारवाईचा मुख्य उद्देश इराणची लष्करी ताकद आणि अण्वस्त्र महत्त्वाकांक्षा पूर्णपणे नष्ट करणे हा आहे. त्यांनी स्पष्ट केले की, “आम्ही जिंकण्यासाठी लढतो, वेळ वाया घालवण्यासाठी नाही.”

अण्वस्त्र क्षमतेवर लक्ष्य

अमेरिकेच्या संरक्षण विभाग पेंटागॉन ने अधिकृत निवेदनात म्हटले आहे की, या कारवाईचा मुख्य उद्देश इराणची अण्वस्त्र क्षमता नष्ट करणे हा आहे. इराणने अमेरिकन तळांवर किंवा मित्र राष्ट्रांवर हल्ला केल्यास त्याचे गंभीर परिणाम होतील, असा इशाराही देण्यात आला आहे.

हेगसेथ यांनी इराणच्या अणू कार्यक्रमावरही प्रश्नचिन्ह उपस्थित केले. त्यांनी म्हटले की, “जर अणू प्रकल्प शांततापूर्ण उद्देशांसाठी असतील, तर त्यांना डोंगरांच्या खाली गुप्तपणे उभारण्याची गरज नसते.” त्यांनी इराणवर दहशतवादी गटांना समर्थन देण्याचाही आरोप केला.

मध्य-पूर्वेत तणाव वाढला

दरम्यान, इस्त्राईल आणि इराणमधील वाढत्या संघर्षामुळे संपूर्ण मध्य-पूर्वेत तणावाचे वातावरण निर्माण झाले आहे. इराणची राजधानी तेहरान आणि अन्य लष्करी केंद्रांवर लक्ष ठेवले जात असून, परिस्थिती अधिक चिघळण्याची शक्यता व्यक्त केली जात आहे.

अमेरिकेने स्पष्ट केले आहे की, ही कारवाई सत्तापालटासाठी नसून, इराणची अण्वस्त्र क्षमता नष्ट करून जागतिक सुरक्षेला धोका कमी करणे हा त्यामागील मुख्य उद्देश आहे.