जानवळे मोहल्ला येथे रमजान निमित्त आयोजित इफ्तार पार्टीमध्ये प्रमुख पाहुणे प्रमोदजी गांधी व मान्यवरांसह ग्रामस्थ उपस्थित.

गुहागर (प्रतिनिधी – मंगेश जाधव):
गुहागर तालुक्यातील जानवळे मोहल्ला येथे पवित्र रमजान महिन्यानिमित्त इफ्तार पार्टीचे आयोजन उत्साहात करण्यात आले. या कार्यक्रमासाठी नूतन जिल्हा परिषद सदस्य तथा महाराष्ट्र नवनिर्माण सेना (मनसे) गुहागर तालुका संपर्क अध्यक्ष श्री. प्रमोदजी गांधी यांना प्रमुख पाहुणे म्हणून आमंत्रित करण्यात आले होते. तसेच महाराष्ट्र नवनिर्माण सेना उपजिल्हाध्यक्ष श्री. विनोद जानवळकर आणि जानवळे गावच्या उपसरपंच सौ. वैभवी जानवळकर यांचीही प्रमुख उपस्थिती लाभली.
यावेळी उपस्थितांना मार्गदर्शन करताना श्री. प्रमोदजी गांधी यांनी सांगितले की, समाजात सर्वधर्मीय एकोप्याचे वातावरण निर्माण होणे अत्यंत आवश्यक आहे. इफ्तार पार्टीसारख्या सामाजिक कार्यक्रमांमुळे समाजात ऐक्य, बंधुभाव आणि परस्पर सन्मानाची भावना अधिक दृढ होते. अशा उपक्रमांमुळे विविध समाजघटक एकत्र येऊन सामाजिक सलोखा वाढविण्यास मदत होते. त्यांनी सर्व मुस्लिम बांधवांना पवित्र रमजान महिन्याच्या हार्दिक शुभेच्छा दिल्या.
या कार्यक्रमास पंचायत समिती सदस्य गौरव वेल्हाळ, सरपंच सौ. जान्हवी विखारे, विविध राजकीय पक्षांचे पदाधिकारी, सामाजिक कार्यकर्ते तसेच ग्रामस्थ मोठ्या संख्येने उपस्थित होते. कार्यक्रमाचे आयोजन अत्यंत नियोजनबद्ध पद्धतीने करण्यात आले असून उपस्थितांनी या उपक्रमाचे कौतुक केले.