दापोली :

संतोषभाई मेहता इंग्लिश मीडियम स्कूलमध्ये राष्ट्रीय विज्ञान दिन मोठ्या उत्साहात, नावीन्यपूर्ण उपक्रमांनी आणि ज्ञानमय वातावरणात साजरा करण्यात आला. या विशेष दिनानिमित्त शाळेत भव्य विज्ञान प्रदर्शनाचे आयोजन करण्यात आले होते, जिथे शाळेचा परिसर विद्यार्थ्यांच्या कल्पकतेने, संशोधन वृत्तीने आणि वैज्ञानिक दृष्टिकोनाने उजळून निघाला होता.

या विज्ञान प्रदर्शनात इयत्ता तिसरी ते नववीतील विद्यार्थ्यांनी उत्साहाने सहभाग नोंदवला. आरोग्य, जीवशास्त्र व जीवनविज्ञान, पर्यावरण व शाश्वतता, ऊर्जा व तंत्रज्ञान, कृषी व अन्न सुरक्षा, सुरक्षा, दैनंदिन जीवनातील विज्ञान, अंतराळ व खगोलशास्त्र तसेच जादूतील विज्ञान अशा विविध विषयांवर विद्यार्थ्यांनी अभिनव व माहितीपूर्ण प्रकल्प सादर केले. विद्यार्थ्यांनी फक्त मॉडेल्स सादर केले नाहीत, तर त्यामागील वैज्ञानिक तत्त्वे आत्मविश्वासाने स्पष्ट करून उपस्थितांची दाद मिळवली.

याचबरोबर शिक्षकांनी तयार केलेल्या शैक्षणिक साहित्याचेही विशेष प्रदर्शन भरविण्यात आले. विविध अध्यापन साधने, प्रयोगसामग्री व नवकल्पक शिक्षण पद्धतींचे सादरीकरण पाहून पालकांनी कौतुक व्यक्त केले.

कार्यक्रमाचे उद्घाटन ज्ञानदीप दापोलीचे सेक्रेटरी सुजय मेहता यांच्या हस्ते पार पडले. आपल्या प्रेरणादायी भाषणात त्यांनी विद्यार्थ्यांना विज्ञाननिष्ठ विचारसरणी जोपासण्याचे व संशोधनाची आवड निर्माण करण्याचे आवाहन केले.

विज्ञान प्रदर्शनाचे आयोजन शाळेच्या मुख्याध्यापिका चंदाली पारकर यांच्या दूरदृष्टीपूर्ण मार्गदर्शनाखाली तसेच सर्व शिक्षकांच्या परिश्रमपूर्वक सहकार्याने अत्यंत उत्कृष्ट व शिस्तबद्ध पद्धतीने पार पडले. शिक्षकांनी विद्यार्थ्यांना योग्य दिशा देत त्यांच्या कल्पनाशक्तीला वाव दिला आणि प्रत्येक प्रकल्पात गुणवत्ता व नावीन्य दिसून आले.

पालकांनी मोठ्या संख्येने उपस्थित राहून विद्यार्थ्यांच्या कार्याचे मनापासून कौतुक केले. विद्यार्थी, पालक व शिक्षक यांच्या उत्स्फूर्त सहभागामुळे हा राष्ट्रीय विज्ञान दिन सोहळा शाळेच्या इतिहासातील एक संस्मरणीय आणि प्रेरणादायी पर्व

ठरला.