रत्नागिरीतील अभियांत्रिकी महाविद्यालयात रॅगिंगचा प्रकार; ‘कॉमन ऑफ’साठी विद्यार्थ्यांना त्रास

रत्नागिरी : शहरातील लोकनेते शामराव पेजे शासकीय अभियांत्रिकी महाविद्यालय येथे रॅगिंगचा धक्कादायक प्रकार उघडकीस आला आहे. ‘कॉमन ऑफ’ घेण्यासाठी आठ विद्यार्थ्यांनी प्रथम वर्षातील तीन विद्यार्थ्यांना मानसिक त्रास दिल्याची तक्रार समोर आली आहे.

मिळालेल्या माहितीनुसार, पीडित तीन विद्यार्थी प्रथम वर्षात शिक्षण घेत असून, त्याच विभागातील आठ विद्यार्थ्यांनी एकत्र येत त्यांच्यावर दबाव टाकण्यास सुरुवात केली. ‘कॉमन ऑफ’ घेण्यासाठी जबरदस्ती करताना शिवीगाळ, धमक्या आणि वाद घालून मानसिक छळ केल्याचा आरोप तक्रारीत करण्यात आला आहे.

या प्रकारामुळे त्रस्त झालेल्या विद्यार्थ्यांनी संबंधित शिक्षकांना माहिती देत अखेर महाविद्यालयाच्या प्राचार्यांकडे अधिकृत तक्रार दाखल केली आहे. या घटनेची दखल रत्नागिरी शहर पोलीस यांनीही घेतली असून, याबाबत अधिकृत माहिती अद्याप जाहीर करण्यात आलेली नाही.

महाविद्यालय परिसरात या घटनेमुळे खळबळ उडाली असून, रॅगिंगसारख्या गंभीर प्रकारांवर कठोर कारवाईची मागणी विद्यार्थी व पालकांकडून होत आहे.