दापोली : नागोठणे ग्रामीण विभाग पत्रकार असोसिएशनच्या १४व्या वर्धापन दिनानिमित्त आयोजित कार्यक्रमात दैनिक रत्नागिरी टाइम्सचे पत्रकार यशवंत कांबळे यांना त्यांच्या समाजाभिमुख पत्रकारितेसाठी सन्मानित करण्यात आले. या प्रसंगी खासदार सुनील तटकरे यांनी त्यांच्या कार्याचे विशेष कौतुक केले.

श्री जोगेश्वरी माता प्रांगणात पार पडलेल्या या कार्यक्रमात अध्यक्षस्थानावरून बोलताना तटकरे म्हणाले की, आजच्या स्पर्धात्मक सोशल मीडिया युगातही यशवंत कांबळे यांनी आपल्या लेखनातून वेगळी ओळख निर्माण केली आहे. सत्य, वस्तुनिष्ठता आणि समाजहिताचा संगम त्यांच्या पत्रकारितेत स्पष्टपणे दिसून येतो, असे त्यांनी नमूद केले.

यावेळी यशवंत कांबळे यांना कै. तात्यासाहेब टके ज्येष्ठ पत्रकार पुरस्कार देऊन सन्मानित करण्यात आले. या सन्मानामुळे त्यांच्या कार्याला अधिक प्रेरणा मिळेल, असा विश्वासही तटकरे यांनी व्यक्त केला.

कार्यक्रमात नागोठणे पत्रकार असोसिएशनच्या कार्याचाही गौरव करण्यात आला. गेल्या १४ वर्षांपासून संस्था पत्रकार, मान्यवर आणि गुणवंत विद्यार्थ्यांचा सन्मान करून समाजात सकारात्मक संदेश देत असल्याचे यावेळी सांगण्यात आले.