दापोली (वार्ताहर) : आजच्या स्पर्धात्मक आणि संघर्षमय युगात महिलांनी केवळ पारंपरिक भूमिकांपुरते मर्यादित न राहता आर्थिक उन्नतीचा धागा पकडून उद्योजकतेकडे वाटचाल करावी, असे प्रतिपादन पराग कांबळे यांनी केले. दापोली येथे आयोजित महिला मेळाव्यात ते बोलत होते.

दापोली येथील पेन्शनर्स सभागृहात पार पडलेल्या या कार्यक्रमाचे अध्यक्षस्थान काशीराम पोसकर यांनी भूषविले. यावेळी सूर्यकांत पागडे, निकिता बाळगूडे, मीनाक्षी शिर्के आदी मान्यवर उपस्थित होते.

कार्यक्रमाच्या सुरुवातीला निकिता बाळगूडे यांनी महिला दिनाच्या शुभेच्छा देत उपस्थितांचे स्वागत केले. यानंतर दापोली तालुका बळीराज सेना यांच्या वतीने जिल्हाध्यक्ष पराग कांबळे यांचा शाल, श्रीफळ व पुष्पगुच्छ देऊन सत्कार करण्यात आला.

आपल्या भाषणात कांबळे यांनी महिलांनी आर्थिक नियोजन, कौशल्यविकास आणि लघुउद्योगांच्या माध्यमातून आत्मनिर्भर व्हावे, असे आवाहन केले. तसेच बळीराज सेनेच्या वतीने गरजू महिलांना आवश्यक मार्गदर्शन व मदत देण्याचे आश्वासनही त्यांनी दिले.

या मेळाव्यात महिलांना उद्योग कसा सुरू करावा, याबाबत सखोल मार्गदर्शन करण्यात आले. उपस्थित महिलांनीही आपले विचार मांडत चर्चासत्रात सक्रिय सहभाग घेतला. कार्यक्रम खेळीमेळीच्या वातावरणात पार पडला.

शेवटी निकिता बाळगूडे यांनी आभार प्रदर्शन केले. दापोली तालुक्यात महिलांसाठी अशा प्रकारचे अधिक मेळावे आयोजित करण्याची मागणीही यावेळी करण्यात आली.