नागोठणे | प्रतिनिधी

मुंबई-गोवा महामार्गावर शुक्रवारी पहाटे भीषण अपघात झाला असून खासगी ट्रॅव्हल्स बस पलटी होऊन दोन प्रवाशांचा जागीच मृत्यू झाला, तर ३८ प्रवासी जखमी झाल्याची धक्कादायक घटना समोर आली आहे. हा अपघात नागोठणे जवळील सुकळी खिंडीत घडला.

अपघात कसा झाला?

मिळालेल्या प्राथमिक माहितीनुसार, मुंबईहून गोव्याकडे निघालेली ही बस सुकळी खिंडीतून जात असताना चालकाचे नियंत्रण सुटले. काही क्षणांतच बस रस्त्यावरून घसरत पलटी झाली आणि रस्त्याच्या कडेला फेकली गेली. अपघाताची तीव्रता इतकी होती की बसचे मोठे नुकसान झाले.

जखमींची स्थिती गंभीर

या अपघातात जखमी झालेल्या प्रवाशांपैकी ८ ते ९ जणांची प्रकृती चिंताजनक असल्याची माहिती समोर आली आहे. त्यामुळे मृतांचा आकडा वाढण्याची भीती व्यक्त केली जात आहे.

उपचार सुरू

अपघातातील जखमींना तातडीने एमजीएम रुग्णालय येथे हलवण्यात आले असून त्यांच्यावर उपचार सुरू आहेत. काही प्रवाशांना किरकोळ दुखापती झाल्या असून त्यांच्यावर प्राथमिक उपचार करण्यात आले.

स्थानिकांचा धावून मदतीचा हात

अपघातानंतर प्रवाशांचा आक्रोश ऐकून स्थानिक नागरिकांनी तात्काळ घटनास्थळी धाव घेतली आणि बचावकार्य सुरू केले. त्यानंतर पोलिस आणि आपत्कालीन यंत्रणांनीही वेगाने प्रतिसाद देत अडकलेल्या प्रवाशांची सुटका केली.

मुंबई-गोवा महामार्गावरील वारंवार होणारे अपघात लक्षात घेता, या मार्गावरील सुरक्षेचा प्रश्न पुन्हा ऐरणीवर आला आहे.