दापोली (प्रतिनिधी) : तालुक्यातील खेर्डी उपकेंद्रात आज दिनांक ३ एप्रिल २०२६ रोजी पिसई आरोग्य केंद्राच्या वतीने सर्वसमावेशक आरोग्य शिबिराचे आयोजन करण्यात आले. या शिबिराला स्थानिक ग्रामस्थांचा उत्स्फूर्त प्रतिसाद लाभला असून मोठ्या संख्येने नागरिकांनी विविध आरोग्य तपासण्या करून घेतल्या.

या कार्यक्रमाचे उद्घाटन नवनिर्वाचित जिल्हा परिषद सदस्या सौ. मिनाक्षी विनय शेडगे यांच्या हस्ते करण्यात आले. यावेळी डाॅ. वैदही राजाराम जोईल तसेच मा. सरपंच अनिल जाधव उपस्थित होते. उद्घाटनानंतर सौ. शेडगे यांनी उपस्थितांना मार्गदर्शन करत आरोग्याची काळजी घेण्याचे आवाहन केले. तर डाॅ. वैदही जोईल यांनी आरोग्य विषयक मोलाचे मार्गदर्शन करत विशेषतः HPV लसीकरणाबाबत अल्पवयीन मुली व त्यांच्या पालकांना सविस्तर माहिती दिली.

या शिबिरात ईसीजी, एक्स-रे, रक्तदाब (BP), मधुमेह यांसह विविध आरोग्य तपासण्या करण्यात आल्या. तसेच अनेक ग्रामस्थांची प्राथमिक तपासणी करून आवश्यक सल्ला देण्यात आला. कार्यक्रमाचे सूत्रसंचालन आरोग्य सेवक प्रफुल्ल केळसकर यांनी केले.

या शिबिरात आरोग्य विभागाचे कर्मचारी—प्रफुल्ल केळसकर (आरोग्य सेवक), निलम बापू साळुंखे (CHO), दीक्षिता मोहोरे (CHO), संघपाल पांडे (STLS), सुजाता हातिसकर, स्वप्नील अरुण जोशी, भुषण कैलास महाले, प्रिया महादेव खेडेकर, मनाली मंगेश कदम (गटप्रवर्तक) तसेच आशा स्वयंसेविका स्नेहा मनोज गोरीवले, मिनल मंगेश जाधव, अनिता रोषण मळेकर, अपेक्षा अनंत गोलांबडे, योगिता गुरूदास सवणसकर यांनी मोलाचे सहकार्य केले.

कार्यक्रमाच्या सुरुवातीला सर्व मान्यवरांचे पुष्पगुच्छ देऊन स्वागत करण्यात आले. शिबिराच्या यशस्वी आयोजनाबद्दल मा. सरपंच अनिल जाधव यांनी सर्व आयोजकांचे आभार मानले. तसेच ग्रामस्थांनीही डॉक्टर व सर्व आरोग्य कर्मचाऱ्यांचे आभार व्यक्त केले.

 

*मान्यवरांच्या प्रतिक्रिया*

*🗣️ सौ. मिनाक्षी विनय शेडगे (जिल्हा परिषद सदस्या) : “ग्रामीण भागात अशा प्रकारचे आरोग्य शिबिर अत्यंत गरजेचे आहेत. या उपक्रमामुळे नागरिकांना वेळेवर तपासणी व योग्य मार्गदर्शन मिळते.”*

 

*🗣️ डाॅ. वैदही राजाराम जोईल :*

*“नियमित आरोग्य तपासणीमुळे अनेक आजारांचे लवकर निदान होऊ शकते. विशेषतः HPV लसीकरणाबाबत पालकांनी जागरूक राहणे आवश्यक आहे.”*

 

*🗣️ अनिल जाधव (सरपंच, खेर्डी) :*

*“ग्रामस्थांना एकाच ठिकाणी सर्व सुविधा उपलब्ध करून दिल्यामुळे या शिबिराचा मोठा फायदा झाला आहे. अशा उपक्रमांचे सातत्याने आयोजन व्हावे.”*

 

*एकूणच, खेर्डी येथे आयोजित करण्यात आलेले हे आरोग्य शिबिर यशस्वी ठरले असून ग्रामस्थांच्या आरोग्याच्या दृष्टीने महत्त्वपूर्ण पाऊल ठरले आहे.*