आंतरराष्ट्रीय | प्रतिनिधी :

मध्यपूर्वेतील तणाव पुन्हा वाढल्याने जागतिक अर्थव्यवस्थेच्या दृष्टीने अत्यंत महत्त्वाची असलेली होर्मुझ सामुद्रधुनी पुन्हा एकदा बंद करण्यात आली आहे. इराणने घेतलेल्या या निर्णयामुळे तेल आणि गॅस वाहतुकीवर मोठा परिणाम होण्याची शक्यता व्यक्त केली जात आहे.

इराण आणि अमेरिका यांच्यात झालेल्या शस्त्रसंधीनंतर काही काळासाठी ही सामुद्रधुनी खुली करण्यात आली होती. मात्र, इस्रायल ने लेबनान मध्ये केलेल्या हल्ल्यानंतर परिस्थिती पुन्हा चिघळली असून, इराणने होर्मुझ मार्गावरील जहाजांची ये-जा थांबवली आहे.

इराणी सरकारी माध्यमांनुसार, बुधवारी सकाळी दोन तेलवाहू जहाजांना विशेष परवानगी देऊन मार्गक्रमण करू देण्यात आले. त्यानंतर मात्र सर्व जहाजांची वाहतूक थांबवण्यात आली. इराणच्या Islamic Revolutionary Guard Corps (IRGC) कडून खाडी परिसरातील जहाजांना इशारा देण्यात आला आहे.

या इशाऱ्यात स्पष्ट करण्यात आले आहे की,

👉 होर्मुझ सामुद्रधुनीतून जाण्यासाठी आधी IRGC ची परवानगी आवश्यक असेल

👉 परवानगीशिवाय पुढे जाणाऱ्या जहाजांवर कारवाई केली जाईल

BBC च्या अहवालानुसार, जहाजांना रेडिओ चॅनेलद्वारे सतर्कतेचा संदेश देण्यात आला असून, हा चॅनेल आंतरराष्ट्रीय सागरी सुरक्षा सूचनांसाठी वापरला जातो.

⚠️ जागतिक परिणामाची शक्यता

होर्मुझ सामुद्रधुनी ही जगातील सर्वात महत्त्वाची तेल वाहतूक मार्गांपैकी एक मानली जाते. येथे अडथळा निर्माण झाल्यास जागतिक बाजारात तेलाच्या किमती वाढण्याची शक्यता असून, त्याचा परिणाम भारतासह अनेक देशांच्या अर्थव्यवस्थेवर होऊ शकतो.

👉 सध्या परिस्थिती तणावपूर्ण असून, पुढील घडामोडींवर जगभरातील देशांचे लक्ष लागले आहे.