रत्नागिरी | प्रतिनिधी :

उसने घेतलेल्या रकमेच्या परतफेडीसाठी दिलेला धनादेश अनादरित झाल्याप्रकरणी न्यायालयाने आरोपीस शिक्षा सुनावली आहे. न्यायालयाने आरोपीस ३ महिने साधा कारावास तसेच ४ लाख ५० हजार रुपये रक्कम ९ टक्के व्याजासह दोन महिन्यांत परत करण्याचा आदेश दिला आहे.

या प्रकरणातील आरोपीचे नाव निरंजन हेमंत सावंत असे आहे. सावंत यांनी २०१९ साली तक्रारदाराकडून व्यवसायासाठी भांडवलाची गरज असल्याचे सांगून ४ लाख ५० हजार रुपये उसने घेतले होते.

रक्कम परत करताना आरोपीने तक्रारदारास धनादेश दिला. मात्र, संबंधित धनादेश बँकेत सादर केल्यानंतर तो अनादरित (बाउन्स) झाला. यानंतर तक्रारदाराने न्यायालयात दाद मागत खटला दाखल केला होता.

सुनावणीदरम्यान सादर करण्यात आलेल्या पुराव्यांच्या आधारे न्यायालयाने आरोपीस दोषी ठरवत वरीलप्रमाणे शिक्षा ठोठावली.

या प्रकरणात तक्रारदाराच्या वतीने ॲड. डी. ओ. आठवले आणि ॲड. एन. डी. आठवले यांनी बाजू मांडली.

👉 या निर्णयामुळे धनादेश अनादर प्रकरणांमध्ये न्यायालयाकडून कठोर भूमिका घेतली जात असल्याचे पुन्हा स्पष्ट झाले आहे.