दापोली | प्रतिनिधी :

दापोली शहर व्यापारी महासंघाच्या वतीने दापोली बाजारपेठेत अलीकडेच लागलेल्या आगीत नुकसान झालेल्या व्यापाऱ्यांना तातडीने आर्थिक मदत देण्याची मागणी करण्यात आली आहे. याबाबत महासंघाने राज्याचे गृहराज्यमंत्री योगेश कदम यांना निवेदन सादर केले आहे.

दि. ४ एप्रिल २०२६ रोजी दापोली बाजारपेठ परिसरात लागलेल्या भीषण आगीत सुमारे पाच दुकाने जळून खाक झाली. यापैकी दोन दुकाने पूर्णपणे उद्ध्वस्त झाली असून काही व्यापाऱ्यांचे ७० ते ८० लाख रुपयांपर्यंत मोठे आर्थिक नुकसान झाल्याचे समोर आले आहे. या घटनेमुळे संबंधित व्यापाऱ्यांवर गंभीर आर्थिक संकट कोसळले आहे.

महासंघाने आपल्या निवेदनात प्रशासनाच्या आपत्कालीन व्यवस्थेतील त्रुटींवरही बोट ठेवले आहे. आग आटोक्यात आणण्यासाठी स्थानिक नागरिकांनाच पुढाकार घ्यावा लागला, तसेच अग्निशमन दल घटनास्थळी पोहोचण्यास सुमारे एक तासाचा विलंब झाल्याचे नमूद करण्यात आले आहे.

याशिवाय, बाजारपेठेतील फायर सेफ्टी यंत्रणा—जसे की फायर हायड्रंट आणि लाईट पोल—अकार्यक्षम अवस्थेत असल्याने भविष्यात अशा घटनांचा धोका अधिक वाढू शकतो, असा इशाराही महासंघाने दिला आहे.

शहरातील वाढत्या लोकसंख्येच्या पार्श्वभूमीवर अग्निसुरक्षा व्यवस्था तातडीने बळकट करणे अत्यावश्यक असल्याचे महासंघाने स्पष्ट केले आहे. तसेच बाधित व्यापाऱ्यांना तात्काळ आर्थिक मदत जाहीर करावी आणि शहरात आधुनिक अग्निसुरक्षा यंत्रणा उभारावी, अशी ठाम मागणी करण्यात आली आहे.

दरम्यान, योगेश कदम यांनी व्यापारी महासंघाच्या शिष्टमंडळासोबत लवकरच सर्व संबंधित विभागांच्या अधिकाऱ्यांची संयुक्त बैठक आयोजित करण्याची तयारी दर्शवली आहे.

या बैठकीत नुकसान भरपाई, अग्निसुरक्षा उपाययोजना आणि भविष्यात अशा घटना टाळण्यासाठी ठोस आराखडा तयार केला जाईल, अशी अपेक्षा व्यक्त केली जात आहे.

या वेळी दापोली शहर व्यापारी महासंघाचे अध्यक्ष, उपाध्यक्ष, सचिव तसेच सर्व पदाधिकारी व मोठ्या संख्येने सभासद उपस्थित होते.