दापोली (प्रतिनिधी)

कोकणातील हिरव्यागार डोंगररांगा, निसर्गरम्य दऱ्या आणि शांत वातावरणाच्या कुशीत वसलेले दापोली तालुक्यातील आंबवली बुद्रुक गाव लवकरच भक्ती, परंपरा आणि सांस्कृतिक वैभवाने उजळून निघणार आहे. ग्रामदैवत श्री काळेश्वरी देवी मंदिराचा जिर्णोद्धार आणि मूर्ती प्राणप्रतिष्ठा सोहळा दि. २२ ते २४ एप्रिल २०२६ या कालावधीत अत्यंत भव्य व उत्साहपूर्ण वातावरणात पार पडणार असून, या सोहळ्याकडे संपूर्ण कोकणासह राज्यभरातील भाविकांचे लक्ष लागले आहे.

आंबवली सांस्कृतिक सेवा मंडळ (रजि.) तसेच समस्त ग्रामस्थ (ग्रामीण व मुंबई मंडळ) यांच्या संयुक्त पुढाकारातून साकारलेला हा सोहळा केवळ धार्मिक कार्यक्रम नसून गावाच्या सांस्कृतिक पुनर्जागरणाचा एक महत्त्वपूर्ण टप्पा ठरत आहे. डोंगरांच्या कुशीत नव्याने उभारलेले मंदिर आंबवलीच्या श्रद्धेचे आणि अस्मितेचे भव्य प्रतीक ठरत आहे.

सोहळ्याची सुरुवात बुधवार दि. २२ एप्रिल रोजी सकाळी ८ वाजता पारंपरिक धार्मिक विधींनी होणार असून सकाळी ११ वाजता मंदिर उद्घाटन सोहळा पार पडेल. त्यानंतर देवीची भव्य मिरवणूक काढण्यात येणार असून संपूर्ण गाव भक्तिमय वातावरणात न्हाऊन निघेल.

दि. २३ एप्रिल हा मुख्य दिवस असून सकाळी ९ वाजता मूर्ती प्राणप्रतिष्ठा विधी पार पडणार आहे. सायंकाळी महाआरतीनंतर ‘बुवा-जहांगीर (आतगाव)’ यांचा भजनाचा सामना भाविकांना आध्यात्मिक आनंद देणार आहे.

सोहळ्याच्या सांगता दिनी म्हणजेच दि. २४ एप्रिल रोजी पहाटे काकड आरती, मान्यवरांचा सत्कार आणि महिलांसाठी हळदी-कुंकू समारंभ आयोजित करण्यात आला आहे. याच दिवशी रात्री ‘अस्तित्व महाराष्ट्राचं’ प्रस्तुत ‘रामायण’ हे भव्य महानाट्य सादर होणार आहे.

भाविकांसाठी विशेष आकर्षण म्हणून दि. २४ एप्रिल रोजी दुपारी व रात्री महाप्रसाद (भंडारा) आयोजित करण्यात आला असून हजारो भाविक उपस्थित राहण्याची शक्यता आहे.

या भव्य सोहळ्यासाठी राज्याचे राज्यमंत्री योगेशदादा कदम प्रमुख पाहुणे म्हणून उपस्थित राहणार असून विविध राजकीय, सामाजिक व सांस्कृतिक क्षेत्रातील मान्यवरांची उपस्थिती लाभणार आहे.

कोकणातील निसर्गरम्य वातावरणात साजरा होणारा हा सोहळा श्रद्धा, परंपरा आणि एकात्मतेचा संदेश देणारा ठरणार आहे. पुढील पिढीपर्यंत संस्कृती आणि आध्यात्मिक वारसा पोहोचवण्याचा आंबवलीकरांचा हा उपक्रम निश्चितच प्रेरणादायी ठरत आहे. या ऐतिहासिक सोहळ्याला भाविकांनी मोठ्या संख्येने उपस्थित राहावे, असे आवाहन आयोजकांनी केले आहे.

📍 स्थळ

मु. आंबवली बुद्रुक, पो. केळशी, ता. दापोली, जि. रत्नागिरी