डोंबिवली (प्रतिनिधी):

भारतरत्न डॉ. बाबासाहेब आंबेडकर यांच्या बद्दल सोशल मीडियावर आक्षेपार्ह व घाण शब्दांत लिखाण केल्याप्रकरणी रमेश भिडे या व्यक्तीविरुद्ध डोंबिवली पोलीस ठाण्यात गुन्हा दाखल करण्यात आला आहे. भीमजयंतीच्या पार्श्वभूमीवर केलेल्या या लिखाणामुळे समाजात तीव्र संताप व्यक्त करण्यात आला होता.

मिळालेल्या माहितीनुसार, संबंधित व्यक्ती गेल्या काही दिवसांपासून जाणीवपूर्वक वादग्रस्त आणि द्वेषपूर्ण पोस्ट करत होता. यामुळे समाजात तणाव निर्माण होण्याची शक्यता निर्माण झाली होती. नागरिक व सामाजिक कार्यकर्त्यांनी याबाबत पोलिसांकडे तक्रार दाखल केल्यानंतर तत्काळ कारवाई करण्यात आली.

पोलीसांनी भारतीय न्याय संहिता (BNS) 2023 मधील कलम 196, 299 तसेच अनुसूचित जाती-जमाती अत्याचार प्रतिबंधक कायद्यांतर्गत संबंधित व्यक्तीवर गुन्हा नोंदवला आहे. या घटनेमुळे कायदा व सुव्यवस्थेचा प्रश्न निर्माण होऊ नये, यासाठी पोलिसांकडून पुढील तपास सुरू आहे.

दरम्यान, या कारवाईमुळे आक्षेपार्ह व समाजद्वेष पसरवणाऱ्या प्रवृत्तींना चाप बसणार असल्याची प्रतिक्रिया नागरिकांतून व्यक्त होत आहे. तसेच, अशा प्रकारच्या कृत्यांना कठोर शिक्षा व्हावी, अशी मागणीही होत आहे.