दापोली (प्रतिनिधी):

बौद्धजन सेवा संघ, दापोली आणि जेसीआय दापोली यांच्या संयुक्त विद्यमाने भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त दापोली येथील आंबेडकर गार्डन येथे भव्य महाआरोग्य शिबिराचे यशस्वी आयोजन करण्यात आले.

या शिबिराला नागरिकांचा उत्स्फूर्त प्रतिसाद लाभला असून सुमारे २५० हून अधिक रुग्णांनी विविध आरोग्य सेवांचा लाभ घेतला. शिबिरामध्ये दंतचिकित्सा, नेत्रचिकित्सा, जनरल फिजिशियनद्वारे सर्वसाधारण तपासणी, बीपी तपासणी आदी सेवा उपलब्ध करून देण्यात आल्या.

महिलांसाठी मोफत सॅनिटरी नॅपकिन वाटप, तसेच गरजू रुग्णांसाठी मोफत मोतीबिंदू शस्त्रक्रियेची नोंदणी व मार्गदर्शन करण्यात आले. या उपक्रमामुळे समाजातील विविध घटकांना मोठा दिलासा मिळाला.

कार्यक्रमाचे उद्घाटन जेसीआय दापोलीचे अध्यक्ष डॉ. कुणाल मेहता यांच्या हस्ते करण्यात आले. यावेळी सचिव रोशन वेदक, प्रकल्प संचालक प्रा. कुणाल मंडलिक, तसेच अतुल गोंदकर, आशिष अमृते, ऋत्विक बापट, फराज रखांगे, भूषण इस्वलकर, प्रा. तेजस मेहता यांसह अनेक मान्यवर उपस्थित होते.

शिबिरात डॉ. अमित क्षीरसागर, डॉ. समर्थ पेंढारे, डॉ. स्वप्नील भोजने, डॉ. ओंकार बागडे यांच्यासह मोकल होमिओपॅथिक मेडिकल कॉलेज व रामराजे नर्सिंग कॉलेजच्या विद्यार्थ्यांनी रुग्णांची तपासणी केली.

नेत्र तपासणीसाठी NAB चिपळूणच्या माध्यमातून डॉ. साकेत राठी, संदीप नलावडे व वैभव फके यांनी ११० रुग्णांची तपासणी केली असून त्यामध्ये ३० मोतीबिंदू रुग्ण आढळले, ज्यांची मोफत शस्त्रक्रिया करण्यात येणार आहे.

शितल लोढा फाउंडेशन व अभिनंदन वेंचर्स यांच्या सहकार्याने रुग्णांना मोफत औषधांचे वितरण करण्यात आले. तसेच ब्रह्माकुमारीज दापोली केंद्राच्या वतीने व्यसनमुक्ती समुपदेशनाचे मार्गदर्शन करण्यात आले.

‘माझी सहेली चॅरिटेबल ट्रस्ट’च्या सहकार्याने सुमारे २४० महिलांना पुनर्वापर करता येणारे कापडी सॅनिटरी पॅड मोफत वितरित करण्यात आले.

यावेळी प्रमुख वक्ते म्हणून ज्येष्ठ बहुजन विचारवंत व संविधान तज्ज्ञ ॲड. डॉ. सुरेश माने यांनी मार्गदर्शन करताना बाबासाहेबांच्या विचारांचा अंगीकार करून समाज परिवर्तनासाठी कार्य करण्याचे आवाहन केले. त्यांनी सांगितले की, महापुरुषांच्या जयंती केवळ औपचारिकतेपुरत्या न ठेवता त्यांच्या विचारांनुसार समाजकारणात सक्रिय सहभाग आवश्यक आहे.

या उपक्रमाच्या यशस्वी आयोजनासाठी बौद्धजन सेवा संघ व जेसीआय दापोलीच्या सर्व पदाधिकारी, स्वयंसेवक आणि वैद्यकीय पथकाचे मोलाचे योगदान लाभले. विशेषतः प्रीतम रूके, शरद जाधव आणि प्रा. कुणाल मंडलिक यांनी विशेष मेहनत घेतली.

एकूणच, सामाजिक बांधिलकी जपत आरोग्य सेवा सर्वसामान्यांपर्यंत पोहोचविणारा हा उपक्रम अत्यंत स्तुत्य ठरला असून, तालुक्यातून आयोजकांवर कौतुकाचा वर्षाव होत आहे.