१२ एप्रिल २०२६ | दापोली, रत्नागिरी

“दापोलीतील विद्यार्थ्यांच्या हितासाठी सम्यक विद्यार्थी आंदोलनाचे विद्यार्थी सज्ज” असा संदेश देत दापोली येथे करिअर गाईडन्स सेमिनार उत्साहात संपन्न झाला.

सम्यक विद्यार्थी आंदोलन, ता. दापोली यांच्या वतीने १२ एप्रिल २०२६ रोजी हा मार्गदर्शनपर उपक्रम आयोजित करण्यात आला होता. दापोली तालुक्यातील विद्यार्थ्यांना योग्य करिअर निवडता यावे आणि त्यांच्या भविष्यासाठी स्पष्ट दिशा मिळावी, या उद्देशाने आर्ट्स, सायन्स, कॉमर्स, स्पर्धा परीक्षा तसेच डिप्लोमा व स्किल बेस्ड कोर्सेस याबाबत सविस्तर मार्गदर्शन करण्यात आले.

या कार्यक्रमाच्या अध्यक्षस्थानी मान. सूरज पवार होते. तर सूत्रसंचालन राज घाडगे यांनी केले. कार्यक्रमाला मान्यवर मार्गदर्शक म्हणून गमरे सर, संदे सर, गुरव मॅडम आणि जाधव सर उपस्थित होते.

यावेळी वंचित बहुजन आघाडी तसेच भारतीय बौद्ध महासभा यांचे पदाधिकारी आणि कार्यकर्ते मोठ्या संख्येने उपस्थित होते. यामध्ये मान. अतिश घाडगे, सुरेश मोरे, नितीन दादा जाधव, अनिल घाडगे तसेच दोन्ही संघटनांचे तालुका पदाधिकारी, विद्यार्थी व पालक सहभागी झाले होते.

कार्यक्रमाची सुरुवात प्रतिमापूजनाने करण्यात आली. त्यानंतर साहिल घाडगे यांनी प्रास्ताविक सादर केले. उपस्थित मान्यवरांचे सत्कार व स्वागत झाल्यानंतर मार्गदर्शन सत्र पार पडले.

अध्यक्षीय मनोगतात मान. सूरज पवार यांनी विद्यार्थ्यांच्या भविष्यासाठी सातत्याने उपक्रम राबवण्याची भूमिका स्पष्ट केली. “विद्यार्थ्यांच्या हितासाठी जे जे करता येईल ते सर्व सम्यक विद्यार्थी आंदोलन करेल. आम्ही विद्यार्थ्यांच्या पाठीशी ठामपणे उभे आहोत,” असे आश्वासन त्यांनी दिले.

कार्यक्रमाच्या शेवटी आभार प्रदर्शन करण्यात आले. हा सेमिनार विद्यार्थ्यांसाठी अत्यंत उपयुक्त ठरल्याची प्रतिक्रिया उपस्थित विद्यार्थी व पालकांनी व्यक्त केली.

दापोलीतील विद्यार्थ्यांच्या करिअर मार्गदर्शनासाठी हा उपक्रम महत्त्वाचा ठरल्याचे मत सर्वत्र व्यक्त करण्यात आले.