​रत्नागिरी: ऑनलाईन बँकिंगच्या माध्यमातून सर्वसामान्यांच्या कष्टाच्या पैशांवर डल्ला मारणाऱ्या आंतरराज्य टोळीच्या मुसक्या आवळण्यात रत्नागिरी पोलिसांना यश आले आहे. साखरी बौद्धवाडी येथील एका व्यक्तीची तब्बल ४ लाख ८२ हजार रुपयांची फसवणूक करणाऱ्या दोन आरोपींना पोलिसांनी मुंबईतील दहीसर परिसरातून अटक केली आहे.

​काय आहे नेमकं प्रकरण?

​मिळालेल्या माहितीनुसार, जयगड पोलीस ठाण्याच्या हद्दीतील साखरी बौद्धवाडी येथील एका खातेदाराच्या बँक खात्यातून अज्ञात भामट्यांनी १७ फेब्रुवारी ते ९ मार्च २०२६ या कालावधीत टप्प्याटप्प्याने ४ लाख ८२ हजार रुपये काढून घेतले होते. आपली फसवणूक झाल्याचे लक्षात येताच संबंधित व्यक्तीने २१ मार्च रोजी जयगड पोलीस ठाण्यात तक्रार दाखल केली होती.

​’असे’ अडकले पोलीस जाळ्यात

​या गुन्ह्याचे गांभीर्य ओळखून तपासाची चक्रे वेगाने फिरवण्यात आली. रत्नागिरी ग्रामीण पोलीस ठाण्याचे प्रभारी पोलीस निरीक्षक राजेंद्र यादव यांच्या मार्गदर्शनाखाली पोलीस उपनिरीक्षक अभय तेली आणि त्यांच्या पथकाने तांत्रिक विश्लेषण, गोपनीय माहिती आणि सीसीटीव्ही फुटेजचा सखोल अभ्यास केला. तपासादरम्यान या गुन्ह्याचे धागेदोरे मुंबईतील दहीसर परिसरात असल्याचे निष्पन्न झाले.

​रत्नागिरी पोलिसांनी दहीसर (पूर्व) भागात सापळा रचून दोघांना ताब्यात घेतले. पोलिसी खाक्या दाखवताच त्यांनी गुन्ह्याची कबुली दिली.

​अटक करण्यात आलेल्या आरोपींची नावे:

​१. दुर्गेश चम्मण रॉय (वय ४८ वर्षे)

२. अर्जुन रामसुंदर चौहान (वय ३८ वर्षे)

​या पथकाने केली कारवाई

​ही धाडसी कारवाई पोलीस उपनिरीक्षक अभय तेली, पोलीस अंमलदार संदेश मोंडे आणि सायबर पोलीस ठाण्याच्या दुर्वा शेटे यांच्या पथकाने केली. शुक्रवारी (१७ एप्रिल) मध्यरात्री दोन्ही आरोपींना रीतसर अटक करण्यात आली आहे.

​पुढील तपास:

या दोघांनी अजून किती जणांना अशा प्रकारे गंडा घातला आहे? तसेच या रॅकेटमध्ये आणखी कोणाचे हात गुंतले आहेत का? याचा सखोल तपास सध्या पोलीस करत आहेत.

​पोलीस आवाहन: आपले बँक डिटेल्स, ओटीपी (OTP) किंवा संशयास्पद लिंक कोणाशीही शेअर करू नका. फसवणूक झाल्यास त्वरित सायबर पोलिसांशी संपर्क साधा.