चिपळूण (प्रतिनिधी) :

चिपळूण शहरात गुरुवारी दुपारनंतर अचानक वादळी वाऱ्यासह जोरदार पावसाने हजेरी लावली. विजांचा कडकडाट, ढगांचा गडगडाट आणि सोबत आलेल्या वेगवान वाऱ्यामुळे नागरिकांची मोठी तारांबळ उडाली.

दिवसभर कडक ऊन आणि स्वच्छ आकाश असतानाच सायंकाळी अचानक वातावरणात बदल झाला. ढगाळ वातावरण तयार होताच पावसाने जोरदार सुरुवात केली. पावसाआधी आलेल्या वादळी वाऱ्यामुळे काही घरांवरील पत्रे हलली, वाळत घातलेले कपडे उडाले, तर काही ठिकाणी झाडे वाकल्याचे चित्र पाहायला मिळाले.

वाऱ्यासोबत उडणाऱ्या धुळीमुळे नागरिकांना त्रास सहन करावा लागला. ग्रामीण भागात सुरू असलेल्या धार्मिक कार्यक्रमांमध्येही व्यत्यय आला आणि नागरिकांची धावपळ उडाली. बाजारपेठेत खरेदीसाठी आलेल्या लोकांनाही अचानक पावसामुळे अडचणींचा सामना करावा लागला.

दरम्यान, वाढत्या उकाड्यामुळे त्रस्त झालेल्या नागरिकांना या पावसामुळे काहीसा दिलासा मिळाला असून वातावरणात गारवा निर्माण झाला आहे. चिपळूण शहरात सुमारे तासभर मुसळधार पाऊस पडल्याने परिसरात पावसाळ्यासारखे वातावरण निर्माण झाले होते.