प्रतिनिधी- खेड

खेड : खेड तालुक्यातील मुंबई–गोवा महामार्गावरील भरणे फागेवाडी स्टॉपजवळ शुक्रवारी (२४ एप्रिल २०२६) रात्री दुचाकीचा भीषण अपघात झाला असून या घटनेत चार जण जखमी झाले आहेत. अचानक एक पादचारी दुचाकीसमोर आल्याने हा अपघात घडल्याची प्राथमिक माहिती समोर आली आहे.

मिळालेल्या माहितीनुसार, शुक्रवारी रात्री सुमारे ८ वाजून २० मिनिटांच्या सुमारास शिंदेवाडी येथून भरणेच्या दिशेने एक दुचाकी जात होती. दरम्यान भरणे फागेवाडी स्टॉपजवळ अचानक एक पादचारी रस्त्यावर आल्याने दुचाकीची जोरदार धडक बसली आणि अपघात घडला.

या अपघातात दुचाकीस्वारासह एकूण चार जण जखमी झाले आहेत. स्थानिक ग्रामस्थ, भरणे नाका सरपंच संतोष गोवळकर तसेच माजी सरपंच खेराडे यांनी तत्काळ घटनास्थळी धाव घेऊन मदतकार्य केले. जखमींना बाहेर काढून तातडीने उपचारासाठी रवाना करण्यात आले.

जखमींमध्ये जयसिंग सखाराम खोपटकर (वय ६०, रा. भरणे जाधववाडी), दिनेश गुलाब चव्हाण (वय ४०, रा. भरणे शिंदेवाडी), संस्कृती दिनेश चव्हाण (वय ११) आणि समृद्धी दिनेश चव्हाण (वय १२, रा. भरणे शिंदेवाडी) यांचा समावेश आहे.

सर्व जखमींना उपजिल्हा रुग्णालय, कळंबणी येथे दाखल करण्यात आले असून त्यांच्यावर उपचार सुरू आहेत. अपघाताची पुढील चौकशी स्थानिक प्रशासनाकडून करण्यात येत आहे.