खेड : तालुक्यातील लोटे औद्योगिक परिसरातील एका कंपनीतून सुमारे २ लाख ५४ हजार १५० रुपयांच्या लोखंडी वजन मापांची चोरी झाल्याची घटना उघडकीस आली आहे. या प्रकरणी खेड पोलिस ठाण्यात गुन्हा दाखल करण्यात आला असून एका ट्रक चालकावर संशय व्यक्त केला जात आहे.

ही घटना २५ मार्च ते २ एप्रिल २०२६ या कालावधीत घडल्याचे समोर आले आहे. २ एप्रिल रोजी सकाळी साडेनऊ वाजता ही बाब निदर्शनास आली. याप्रकरणी अमोल आनंद अकुलकर (वय ४५, रा. चिपळूण) यांनी फिर्याद दिली असून पोलिसांनी संशयित आरोपी संजय सितापराव याच्याविरोधात गुन्हा दाखल केला आहे.

फिर्यादीच्या माहितीनुसार, कंपनीने दोन वेगवेगळ्या कंपन्यांकडून खरेदी करून स्टोअर परिसरात ठेवलेली लोखंडी वजन मापे चोरीस गेली. यामध्ये सुमारे १ लाख ८७ हजार ५०० रुपयांची आणि ६७ हजार ४५० रुपयांची मापे मिळून एकूण २ लाख ५४ हजार १५० रुपयांचा मुद्देमाल चोरीस गेल्याचे स्पष्ट झाले आहे.

सीसीटीव्ही फुटेज तपासताना २ एप्रिल रोजी सकाळी ८:३० वाजता एमएच ०६ बीएल ३०८१ क्रमांकाचा ट्रक कंपनी परिसरात आल्याचे दिसून आले. संबंधित ट्रक चालक वाहनातून उतरून परिसरात फिरताना आणि ट्रकच्या दरवाजांजवळ हालचाल करताना फुटेजमध्ये आढळल्याची माहिती आहे.

या आधारे ट्रक चालकानेच चोरी केल्याचा संशय व्यक्त करण्यात आला आहे. या प्रकरणी भारतीय न्याय संहिता अधिनियम २०२३ च्या कलम ३०३ (२) अंतर्गत गुन्हा दाखल करण्यात आला असून खेड पोलिस अधिक तपास करीत आहेत.