संगमेश्वर : तालुक्यातील देवरुख येथील कृष्णा रेसिडेन्सीच्या पार्किंगमधून चोरीला गेलेली कार पोलिसांनी काही तासांतच शोधून काढली आहे. ही कार संगमेश्वर–देवरुख मुख्य मार्गावरील लोवले येथे बेवारस अवस्थेत सापडली आहे.

ही घटना २७ एप्रिल रोजी सकाळी उघडकीस आली. अमित वासुदेव साने (वय ५२, रा. देवरुख) यांनी त्यांची कार (एमएच १२ सीके ०४८३) नेहमीप्रमाणे २६ एप्रिल रोजी रात्री १०:३० वाजता पार्किंगमध्ये उभी केली होती. मात्र दुसऱ्या दिवशी सकाळी ७:३० वाजता पाहणी केली असता कार चोरीला गेल्याचे लक्षात आले. याबाबत त्यांनी देवरुख पोलीस ठाण्यात तक्रार दाखल केली.

तक्रार मिळताच पोलिसांनी तपास सुरू केला. काही तासांतच संगमेश्वर–देवरुख मार्गावरील लोवले परिसरात एका दुकानाजवळ तीच कार बेवारस अवस्थेत आढळली. पोलिसांनी खात्री केली असता ती चोरीला गेलेली कार असल्याचे स्पष्ट झाले.

चोरट्याने कार तिथेच सोडून पलायन केल्याचा प्राथमिक अंदाज पोलिसांनी वर्तवला आहे. या प्रकरणाचा पुढील तपास हेडकॉन्स्टेबल सचिन कामेरकर करत आहेत.