दापोली : दापोली तालुक्यातील आसूद गावाजवळ हर्णे–दापोली मार्गावर रविवारी मध्यरात्री भीषण अपघात घडला. चालकाचा ताबा सुटल्याने कार थेट सुमारे ५० फूट खोल दरीत कोसळली असून या अपघातात तिघे जण गंभीर जखमी झाले आहेत.

मिळालेल्या माहितीनुसार, संतोष पाते (रा. लष्करवाडी, जालगाव) यांच्यासह अन्य दोघे लग्न समारंभ आटोपून घरी परतत असताना हा अपघात झाला. रविवारी मध्यरात्री सुमारे १२ वाजण्याच्या सुमारास कारवरील नियंत्रण सुटल्याने ती दरीत कोसळली.

अपघातानंतर जखमींच्या ओरडण्याचा आवाज ऐकून स्थानिक ग्रामस्थांनी तत्काळ घटनास्थळी धाव घेतली. ग्रामस्थांच्या मदतीने कारच्या काचा फोडून तिघांनाही बाहेर काढण्यात आले. त्यांना सुरुवातीला उपजिल्हा रुग्णालयात दाखल करण्यात आले असून प्रकृती गंभीर असल्याने पुढील उपचारासाठी खासगी रुग्णालयात हलवण्यात आले आहे.

⚠️ धोकादायक वळणाबाबत ग्रामस्थांची नाराजी

आसूद येथील हे वळण अत्यंत धोकादायक असल्याचे ग्रामस्थांचे म्हणणे असून येथे यापूर्वीही अनेक अपघात झाले आहेत. रस्त्यालगत घरे असल्याने मोठा धोका निर्माण झाला आहे.

🏗️ संरक्षण भिंतीची मागणी

अपघाताची माहिती मिळताच राष्ट्रवादी काँग्रेस (अजित पवार गट) महिला जिल्हाध्यक्षा साधना बोत्रे यांनी घटनास्थळी भेट देऊन पाहणी केली. या ठिकाणी तातडीने संरक्षण भिंत उभारण्याची मागणी करण्यात आली आहे.