चिपळूण | प्रतिनिधी

तालुक्यातील वेहळे खान मोहल्ला येथे जमिनीच्या जुन्या वादातून दोन शेजारी कुटुंबांमध्ये जोरदार हाणामारी झाल्याची घटना समोर आली आहे. या घटनेत दोन्ही बाजूंनी एकमेकांविरोधात तक्रारी दाखल करण्यात आल्या असून, शिरगाव पोलीस ठाण्यात गुन्हे नोंद करण्यात आले आहेत.

मिळालेल्या माहितीनुसार, फिर्यादी मैमुना इस्माईल बोंदले (वय ५२) आणि आरोपी हे एकमेकांचे शेजारी असून, त्यांच्यात गेल्या काही काळापासून जमिनीच्या कारणावरून वाद सुरू होता. २८ एप्रिल रोजी सकाळी सुमारास अंगणात कचरा टाकल्याच्या कारणावरून वाद उफाळून आला. यावेळी आरोपी अरबिना खान हिने दगडाने हल्ला करत मैमुना बोंदले यांच्या ओठावर प्रहार केला.

दरम्यान, वाद सोडवण्यासाठी आलेले त्यांचे पती इस्माईल बोंदले यांनाही इतर आरोपींनी घेरून लाकडी काठी व दगडाने मारहाण केली. या प्रकरणी पोलिसांनी अरबिना खान, मन्सूर अली खान, माहिल अजीम खान, जमीर खान, राहिल अझीम खान, शरीफा अली खान आणि शबाना मन्सूर खान या सात जणांविरोधात भारतीय न्यायसंहिता २०२३ च्या विविध कलमांनुसार गुन्हा दाखल केला आहे.

दरम्यान, दुसऱ्या बाजूने शबाना मन्सूर खान (वय ४२) यांनी दिलेल्या फिर्यादीत मैमुना बोंदले आणि इस्माईल बोंदले यांच्यावरही गंभीर आरोप करण्यात आले आहेत. त्यांच्या म्हणण्यानुसार, जमीन वादातून झालेल्या वादात इस्माईल बोंदले यांनी कोयत्याने हल्ला करत त्यांना जखमी केले, तसेच त्यांच्या पतीवरही मारहाण करण्यात आली.

या घटनेमुळे वेहळे परिसरात तणावाचे वातावरण निर्माण झाले असून, शिरगाव पोलीस पुढील तपास करत आहेत.