दापोली | प्रतिनिधी

आर. व्ही. बेलोसे एज्युकेशन फाउंडेशन, दापोली संचलित न. का. वराडकर कला व रा. वि. बेलोसे वाणिज्य महाविद्यालयात ‘मराठी व हिंदी साहित्यातील स्त्रीवाद आणि स्त्री-विमर्श’ या विषयावर एकदिवसीय राष्ट्रीय चर्चासत्र उत्साहात आणि शैक्षणिक वातावरणात पार पडले. महाराष्ट्रासह राज्याबाहेरील विद्यार्थी, संशोधक आणि प्राध्यापक मोठ्या संख्येने उपस्थित होते.

कार्यक्रमाच्या प्रारंभी क्रांतीज्योती सावित्रीबाई फुले यांच्या प्रतिमेला पुष्पहार अर्पण करून अभिवादन करण्यात आले. मराठी विभाग प्रमुख प्रा. उत्तम पाटील यांनी उपस्थितांचे स्वागत करत स्त्रीवाद व स्त्री-विमर्श या विषयाचे सखोल विवेचन केले. त्यांनी लेखिका मेघना पेठे आणि साहित्यिक श्री. ना. पेंडसे यांच्या साहित्याचा उल्लेख करत विषय प्रभावीपणे मांडला.

प्राचार्य डॉ. भारत कऱ्हाड यांनी प्रास्ताविकात स्त्रीवाद हा केवळ विचार नसून न्याय आणि समानतेची मागणी असल्याचे सांगितले. हिंदी विषयासाठी बीजभाषण करताना डॉ. जयशंकर पांडे यांनी प्राचीन ते आधुनिक काळातील स्त्रीवादाच्या प्रवाहाचे विश्लेषण केले. सावित्रीबाई फुले आणि महात्मा फुले यांच्या कार्याचा उल्लेख करत त्यांनी स्त्री-मुक्ती चळवळीचे महत्त्व अधोरेखित केले.

मराठी सत्रासाठी प्रा. राजरत्न दवणे यांनी स्त्रीवाद हा समानतेचा विचारप्रवाह असल्याचे स्पष्ट केले, तर डॉ. बाळासाहेब लबडे यांनी स्त्रीवादाची ऐतिहासिक पार्श्वभूमी आणि सामाजिक परिणाम मांडले. उद्घाटन समारंभाचे अध्यक्ष धनंजयराव यादव यांनी स्त्रीवादाच्या अभ्यासात पौराणिक व पाश्चात्त्य संदर्भ समजून घेण्याचे महत्त्व अधोरेखित केले.

समारोप सत्रात डॉ. विद्या शिंदे यांनी स्त्री सन्मान आणि स्वाभिमानाच्या प्रश्नावर प्रभावी भाष्य केले. या चर्चासत्रात सुमारे ४५ ते ५० शोधनिबंध प्राप्त झाले होते, त्यापैकी निवडक १० शोधनिबंधांचे सादरीकरण करण्यात आले. विविध प्राध्यापक व संशोधकांनी सक्रिय सहभाग नोंदवला.

कार्यक्रमाचे यशस्वी आयोजन प्राचार्य डॉ. भारत कऱ्हाड यांच्या मार्गदर्शनाखाली करण्यात आले. विविध समित्यांनी नियोजनबद्ध काम करून कार्यक्रम सुरळीत पार पाडला.

एकूणच, हे राष्ट्रीय चर्चासत्र शैक्षणिकदृष्ट्या समृद्ध, विचारप्रवर्तक आणि यशस्वी ठरले.