खेड : तालुक्यातील खेड–आंबवली मार्गावरील कुडोशी येथील अरुंद जगबुडी पुलावर बुधवारी दुपारी सुमारे तीन वाजण्याच्या सुमारास एस.टी. बस आणि पिकअप वाहनांमध्ये समोरासमोर जोरदार धडक होऊन अपघात घडला. या अपघातात सुदैवाने कोणतीही जीवितहानी किंवा गंभीर दुखापत झाली नसली तरी दोन्ही वाहनांचे मोठ्या प्रमाणात नुकसान झाले आहे.

मिळालेल्या माहितीनुसार, अरुंद पुलावरून दोन्ही वाहने समोरासमोर येत असताना चालकांचा अंदाज चुकल्याने हा अपघात घडला. धडकेचा आवाज मोठा असल्याने परिसरातील नागरिकांनी तत्काळ घटनास्थळी धाव घेत मदतकार्य सुरू केले.

अपघाताची माहिती मिळताच खेड पोलिस तसेच एस.टी. प्रशासनाने घटनास्थळी तातडीने धाव घेत परिस्थिती नियंत्रणात आणली. अपघातानंतर काही काळ या मार्गावरील वाहतूक पूर्णपणे ठप्प झाली होती. त्यामुळे दोन्ही बाजूंना वाहनांच्या लांब रांगा लागल्या होत्या.

पोलिसांनी दोन्ही वाहनांना बाजूला करून वाहतूक सुरळीत करण्याचे प्रयत्न केले. या घटनेमुळे जगबुडी पुलावरील अरुंद रस्त्यामुळे होणाऱ्या अपघातांचा प्रश्न पुन्हा एकदा ऐरणीवर आला आहे.