खेड (प्रतिनिधी):

मुंबई-गोवा महामार्गावर भरणे येथे उभ्या असलेल्या ट्रकला कारने मागून जोरदार धडक दिल्याने भीषण अपघात झाला. ही घटना शुक्रवारी पहाटे सुमारे ३.१० वाजण्याच्या सुमारास घडली असून या अपघातात कारमधील ६ जण जखमी झाले आहेत.

मिळालेल्या माहितीनुसार, मुंबईतील भांडुप येथून मालवणच्या दिशेने निघालेली वॅग्नार कार भरणे येथील एसएमएस हॉस्पिटलसमोर उभ्या असलेल्या ट्रकला पाठीमागून धडकली. धडकेची तीव्रता मोठी असल्याने कारमधील प्रवाशांना गंभीर दुखापत झाली.

या अपघातातील जखमींची नावे पुढीलप्रमाणे आहेत:

जयेश राज शर्मा (२७, नवी मुंबई)

अशा श्रीनिवास नायडू (८०)

सुरेखा संतोष परब (४८)

तीर्थ जितेंद्र ठाकूर (१८)

प्रिय श्रीनिवास नायडू (१ वर्ष)

योगिता सतीश नायडू (३८, सर्व रा. भांडुप, मुंबई)

सर्व जखमींना तातडीने यश मल्टी स्पेशालिटी हॉस्पिटल येथे उपचारासाठी दाखल करण्यात आले असून त्यांच्यावर उपचार सुरू आहेत.

दरम्यान, रुग्णवाहिका चालक सुरज हंबीर यांनी तत्परता दाखवत जखमींना त्वरित रुग्णालयात दाखल करण्यासाठी मदतकार्य केले. या अपघाताची पुढील तपासणी पोलिसांकडून सुरू आहे.