नाशिक (प्रतिनिधी):

परिसाची शक्ती प्राप्त करून देण्याचे आमिष दाखवत कोट्यवधी रुपयांची फसवणूक केल्याप्रकरणी भोंदू अशोक खरात याला शुक्रवारी (दि. १) जिल्हा व सत्र न्यायालयात हजर करण्यात आले. या प्रकरणात न्यायाधीश बी. बडवे यांनी त्याला चार दिवसांची पोलीस कोठडी सुनावली.

सरकारी अभियोक्ता शैलेंद्र बागडे तसेच सहाय्यक सरकारी अभियोक्ता किरण बेंडभर यांनी न्यायालयात युक्तिवाद केला. त्यानुसार, आरोपी अशोक खरात याने फिर्यादी असलेल्या व्यापाऱ्याला ‘अवतार पूजा’ करण्याचे आमिष दाखवून सुमारे ४ ते ५ कोटी रुपये उकळले असल्याचा आरोप आहे.

याशिवाय, मृत्यूची भीती दाखवत फिर्यादीकडून महागडी कार ताब्यात घेऊन ती स्वतःच्या नावावर करून घेतल्याचा धक्कादायक प्रकारही समोर आला आहे.

तसेच, “परिसाची शक्ती मिळवण्यासाठी २१ देशांचा दौरा करावा लागेल, अन्यथा नागदेवता दंश करून मृत्यू होईल,” अशी भीती दाखवून आरोपीने फिर्यादीच्या पैशांवर २१ देशांचा दौरा करत मौजमजा केल्याचे तपासात उघड झाले आहे.

पुढे, गुरुसेवेच्या नावाखाली आणि पुन्हा मृत्यूची भीती दाखवून आरोपीने फिर्यादीला अमेरिकेत नेऊन महागडे उपचारही करून घेतले. त्यानंतर उत्तरपूजेच्या नावाखाली सिन्नर तालुक्यातील फार्महाऊसवर बांधकामासाठी जबरदस्तीने खर्च वसूल केल्याचा आरोप आहे.

या प्रकरणाचा तपास एसआयटी (Special Investigation Team) मार्फत सुरू असून न्यायालयात अधिक तपासासाठी पाच दिवसांची कोठडी मागण्यात आली होती. मात्र न्यायालयाने चार दिवसांची पोलीस कोठडी मंजूर केली.

दरम्यान, अशोक खरात याच्यावर नाशिकमध्ये एकूण १२ गुन्हे दाखल असून त्यापैकी ८ लैंगिक अत्याचाराचे तर ४ आर्थिक फसवणुकीचे असल्याची माहिती समोर आली आहे.