दापोली (प्रतिनिधी):

नवी मुंबईतील उलवे येथे आयोजित करण्यात आलेल्या Golden Book of World Records अंतर्गत “The Longest Mass Performance of Double Stick Rotation Martial Art” या भव्य विश्वविक्रम उपक्रमात दापोली तालुक्यातील उंबर्ले गावचे श्री. अमोल धयाळकर यांनी उल्लेखनीय सहभाग नोंदवून आपल्या गावाचे नाव उज्वल केले आहे.

या विश्वविक्रम मोहिमेत दुहेरी लाठी फिरवणे (Double Stick Rotation) या पारंपरिक क्रीडा प्रकारात अमोल धयाळकर यांनी उत्कृष्ट सादरीकरण करत उपस्थितांची दाद मिळवली. त्यांच्या या यशामागे प्रशिक्षक श्री. सुरेंद्र शिंदे सर यांचे मार्गदर्शन महत्त्वाचे ठरले असून ते स्वतःही या मोहिमेत सहभागी झाले होते.

हा भव्य कार्यक्रम Warriors’ Club Navi Mumbai यांच्या वतीने आयोजित करण्यात आला होता. कार्यक्रमास महाराष्ट्र विधान परिषदेचे अध्यक्ष प्रा. राम शिंदे, माजी खासदार रामशेठ ठाकूर, आमदार प्रशांत ठाकूर आणि महेश बालदी यांची प्रमुख उपस्थिती लाभली.

अमोल धयाळकर यांच्या या यशस्वी सहभागाबद्दल दापोलीकरांकडून त्यांचे कौतुक करण्यात येत असून प्रशिक्षक सुरेंद्र शिंदे व राष्ट्रीय पंच कविता शिंदे यांनी अभिनंदन करून पुढील वाटचालीस शुभेच्छा दिल्या आहेत.

या यशामुळे दापोली तालुक्यातील क्रीडा परंपरेत आणखी एक मानाचा तुरा रोवला गेला असून परिसरात आनंद व अभिमानाचे वातावरण निर्माण झाले आहे.