पुणे (प्रतिनिधी):

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या बारावी (HSC) परीक्षेचा निकाल उद्या शनिवार (दि. २ मे) दुपारी १ वाजता ऑनलाइन जाहीर करण्यात येणार आहे. विद्यार्थ्यांना विषयनिहाय गुणांची सविस्तर माहिती अधिकृत संकेतस्थळावर पाहता येणार असून त्याची मुद्रित प्रतही काढता येणार असल्याची माहिती राज्य मंडळाचे सचिव डॉ. दीपक माळी यांनी दिली.

यंदा बारावीची परीक्षा १० फेब्रुवारी ते १८ मार्चदरम्यान पार पडली. राज्यभरातून एकूण १५ लाख ३२ हजार ४८७ विद्यार्थ्यांनी परीक्षेसाठी नोंदणी केली होती. सीबीएसई आणि सीआयसीएसई बोर्डाचे निकाल जाहीर झाल्यानंतर राज्य मंडळाच्या निकालाकडे विद्यार्थ्यांचे लक्ष लागले होते.

विद्यार्थ्यांना mahahsscboard.in आणि mahresult.nic.in या संकेतस्थळांवरून आपला निकाल पाहता येणार आहे.

निकालानंतर विद्यार्थ्यांना गुणपडताळणी, उत्तरपत्रिकेच्या छायाप्रती तसेच पुनर्मूल्यांकनासाठी ऑनलाइन अर्ज करता येणार आहे. यासाठी ३ मे ते १७ मे या कालावधीत अर्ज करता येणार असून, पुनर्मूल्यांकनासाठी अर्ज करण्यापूर्वी उत्तरपत्रिकेची छायाप्रत घेणे आवश्यक आहे. छायाप्रत मिळाल्यानंतर पाच दिवसांच्या आत पुनर्मूल्यांकनासाठी अर्ज करणे बंधनकारक आहे.

राज्यातील लाखो विद्यार्थ्यांची प्रतीक्षा अखेर संपणार असून उद्या दुपारी १ वाजल्यापासून निकाल उपलब्ध होणार आहे.