रत्नागिरी :- डिजिटल अरेस्टच्या नावाखाली रत्नागिरी शहरातील एका ज्येष्ठ नागरिकाची तब्बल १५ लाख ५५ हजार २०० रुपयांची फसवणूक झाल्याचा प्रकार उघडकीस आला आहे. ही घटना मार्च ते एप्रिल या कालावधीत घडली आहे.

पोलिसांकडून मिळालेल्या माहितीनुसार, संबंधित ज्येष्ठ नागरिकाला एका अनोळखी नंबरवरून व्हिडिओ कॉल आला. कॉल करणाऱ्या व्यक्तीने स्वतःला पोलीस महानिरीक्षक असल्याचे सांगितले. त्याने पोलिसांचा गणवेश परिधान केला होता तसेच ओळखपत्र दाखवून विश्वास संपादन करण्याचा प्रयत्न केला.

या व्यक्तीने त्या नागरिकावर दहशतवादी संघटनेशी संबंध असल्याचा आरोप करत, त्यांच्या नावावर दोन कोटी रुपयांचे आर्थिक व्यवहार झाल्याचा बनावट पुरावा दाखवला. तसेच या प्रकरणातून वाचण्यासाठी “डिजिटल अरेस्ट”च्या नावाखाली चौकशी सुरू असल्याचे सांगत त्यांना भीती दाखवली.

यानंतर जवळपास महिनाभर व्हिडिओ कॉलद्वारे दबाव टाकत, बँक खात्याची “व्हेरिफिकेशन प्रक्रिया” असल्याचे सांगून वेळोवेळी रक्कम ट्रान्सफर करण्यास भाग पाडले. अशा प्रकारे एकूण १५ लाख ५५ हजार २०० रुपये उकळण्यात आले.

नंतर आपली फसवणूक झाल्याचे लक्षात आल्यानंतर संबंधित ज्येष्ठ नागरिकाने तात्काळ रत्नागिरी सायबर पोलीस ठाण्यात तक्रार दाखल केली. याप्रकरणी गुन्हा नोंदवण्यात आला असून सायबर पोलीस पुढील तपास करत आहेत.

दरम्यान, रत्नागिरी जिल्हा पोलीस अधीक्षक नितीन बगाटे, अतिरिक्त पोलीस अधीक्षक बी. बी. महामुनी आणि सायबर पोलीस निरीक्षक स्मिता सुतार यांनी नागरिकांना आवाहन केले आहे की, कोणताही अधिकारी (पोलीस, सीबीआय, एनएसए) फोन करून बँक माहिती किंवा पैसे ट्रान्सफर करण्यास सांगत असेल तर त्यावर विश्वास ठेवू नये. वैयक्तिक व आर्थिक माहिती कोणालाही देऊ नये.