संगमेश्वर :- रत्नागिरी–नागपूर महामार्गावरील संगमेश्वर तालुक्यातील देवळे फाटा येथे उभ्या रिक्षाला भरधाव वाहनाने जोरदार धडक दिल्याने रिक्षाचालकाचा जागीच मृत्यू झाल्याची घटना घडली. या अपघातानंतर घटनास्थळावरून फरार झालेल्या वाहनचालकाला देवरूख आणि साखरपा पोलिसांनी अवघ्या दोन तासांत अटक केली.

मृत रिक्षाचालक विजय पांडुरंग कांबळे (वय ६२, रा. चाफवली) हे देवळे फाट्यावर प्रवाशांची वाट पाहत रिक्षा उभे होते. त्यावेळी मागून आलेल्या भरधाव स्कॉर्पिओ वाहनाने (एमएच ०९ जीए ६८८६) त्यांच्या रिक्षाला जोरदार धडक दिली. या धडकेत रिक्षा सुमारे दहा फूट दूर फेकली गेली आणि विजय कांबळे यांचा जागीच मृत्यू झाला. अपघातानंतर चालक घटनास्थळावरून फरार झाला होता.

घटनेची माहिती मिळताच देवरूख आणि साखरपा पोलिसांनी तातडीने तपास सुरू केला. सीसीटीव्ही फुटेजच्या आधारे संशयित वाहनाची ओळख पटवण्यात आली. त्यानंतर पोलिसांनी आंबा घाट परिसरात शोधमोहीम राबवत अवघ्या काही तासांतच आरोपी चालकाला ताब्यात घेतले.

ही कारवाई देवरूख पोलीस निरीक्षक उदय झावरे, साखरपा पोलीस दूरक्षेत्राचे पोलीस उपनिरीक्षक प्रमोद वाघाटे, सहा. पोलीस फौजदार शांताराम पंदेरे, हे. कॉ. गणेश सुतार, चालक कांबळे, पो.हे.कॉ. सचिन कामेरकर, पो.हे.कॉ. सचिन पवार यांच्या पथकाने केली. या कारवाईसाठी पोलीस मित्र सुभाष सुर्वे यांनीही सहकार्य केले.

पुढील तपास पोलिसांकडून सुरू आहे.