📍 पुणे (प्रतिनिधी)

बारामती विधानसभा पोटनिवडणुकीत सुनेत्रा पवार यांनी तब्बल २,१८,९३० मतांच्या विक्रमी फरकाने विजय मिळवत राजकीय वर्तुळात नवा इतिहास घडवला आहे. अजित पवार यांच्या निधनानंतर झालेल्या या निवडणुकीत बारामतीच्या मतदारांनी पुन्हा एकदा पवार कुटुंबावर विश्वास दाखवला.

या विजयासह सुनेत्रा पवार या बारामतीच्या दुसऱ्या महिला आमदार ठरल्या आहेत. यापूर्वी १९६२ मध्ये मालतीबाई शिरोळे (माई) यांनी काँग्रेसच्या तिकिटावर विजय मिळवत बारामतीचे प्रतिनिधित्व केले होते. तब्बल ६४ वर्षांनंतर पुन्हा महिला नेतृत्व बारामतीच्या राजकारणाच्या केंद्रस्थानी आले आहे.

१९६७ पासून बारामतीच्या राजकारणात मोठा टप्पा गाठला तो शरद पवार यांच्या आगमनाने. त्यांनी पहिल्यांदा विजय मिळवत आपल्या दीर्घ आणि प्रभावी राजकीय कारकिर्दीची सुरुवात केली आणि त्यानंतर या मतदारसंघावर पवार कुटुंबाचे वर्चस्व कायम राहिले.

अजित पवार यांनीही या मतदारसंघातून अनेकदा विजय मिळवत मजबूत पकड सिद्ध केली होती. त्यांच्या निधनानंतर झालेल्या या निवडणुकीत सुनेत्रा पवार यांचा प्रचंड मताधिक्याचा विजय हा सहानुभूती, संघटनशक्ती आणि स्थानिक विकासाच्या मुद्द्यांचा परिणाम मानला जात आहे.

आता बारामतीच्या विकासाची मोठी जबाबदारी सुनेत्रा पवार यांच्या खांद्यावर आली असून, आगामी काळात त्या कोणते निर्णय घेतात आणि मतदारांच्या अपेक्षा कशा पूर्ण करतात, याकडे सर्वांचे लक्ष लागले आहे.