📍 ठाणे (प्रतिनिधी)

महाराष्ट्र राज्य मार्ग परिवहन महामंडळ (एसटी) कर्मचाऱ्यांना तयार गणवेश वाटप करण्याच्या निर्णयाला कर्मचाऱ्यांच्या संघटनांकडून तीव्र विरोध होत आहे. हा निर्णय तात्काळ रद्द करून प्रत्येक कर्मचाऱ्याला उच्च दर्जाचे कापड आणि शिलाई भत्ता थेट बँक खात्यात जमा करावा, अशी मागणी महाराष्ट्र मोटार कामगार फेडरेशन यांनी केली आहे. मागण्या मान्य न झाल्यास आंदोलनाचा इशाराही देण्यात आला आहे.

एसटी कर्मचाऱ्यांना गणवेश देण्याची पद्धत अनेक वर्षांपासून सुरू आहे. यापूर्वीही प्रशासनाने तयार गणवेश वाटप केले होते. मात्र, त्या वेळी निकृष्ट दर्जाचे कापड वापरल्याच्या तक्रारी मोठ्या प्रमाणात समोर आल्या होत्या. अनेक कर्मचाऱ्यांचे गणवेश अवघ्या तीन-चार महिन्यांत फाटल्याची उदाहरणेही नोंदवली गेली होती. त्यामुळे महामंडळाला कोट्यवधी रुपयांचा फटका बसल्याचे सांगितले जाते. अशा पार्श्वभूमीवर यंदा पुन्हा तयार गणवेशाचा निर्णय घेतल्याने संघटनांनी नाराजी व्यक्त केली आहे.

संघटनेच्या मते, कापड व शिलाई भत्ता देण्याचा पर्याय अधिक योग्य आणि खर्चिक नसून उलट बचतीचा आहे. कर्मचाऱ्यांना स्वतःच्या मापानुसार गणवेश तयार करता येईल, त्यामुळे टिकाऊपणा आणि वापरातील सोयही वाढेल.

औद्योगिक व कामगार कायद्यांनुसार कर्मचाऱ्यांना सुरक्षित आणि योग्य गणवेश देणे हे नियोक्त्याचे कर्तव्य आहे. सध्याचा प्रस्तावित गणवेश कामाच्या स्वरूपाशी सुसंगत नसून अपघाताचा धोका वाढू शकतो, असा दावा फेडरेशनने केला आहे. तसेच मापात न बसणारा गणवेश कर्मचाऱ्यांचा आत्मविश्वास कमी करतो आणि त्याचा परिणाम संस्थेच्या प्रतिमेवरही होतो, असे मत व्यक्त करण्यात आले.

याशिवाय, हजारो कर्मचाऱ्यांचे माप घेणे, गणवेश शिवणे, वाटप करणे आणि तक्रारींचे निवारण करणे या प्रक्रियेत मोठ्या प्रमाणात वेळ आणि मनुष्यबळ खर्ची पडणार असल्याचेही संघटनेने नमूद केले आहे. त्यामुळे तयार गणवेशाऐवजी कापड व शिलाई भत्ता देण्याचा पर्याय स्वीकारावा, अशी ठाम भूमिका संघटनेने घेतली आहे.