प्रतिनिधी – दापोली

दापोली तालुक्यातील वेळवी येथील कलानगर आदिवासीवाडीमध्ये काजूच्या बिया काढण्याच्या कारणावरून झालेल्या वादातून आदिवासी कुटुंबाला शिवीगाळ व धक्काबुक्की केल्याप्रकरणी पाच जणांविरोधात दापोली पोलीस ठाण्यात अनुसूचित जाती-जमाती अत्याचार प्रतिबंधक अधिनियमासह विविध कायद्यांनुसार गुन्हा दाखल करण्यात आला आहे.

दापोली पोलिसांनी दिलेल्या माहितीनुसार, कलानगर आदिवासीवाडी येथील दामोदर श्रीपत पवार (वय ६३) यांनी याबाबत तक्रार दाखल केली आहे. तक्रारीनुसार, दि. २७ फेब्रुवारी रोजी सकाळी सुमारे ११ वाजण्याच्या सुमारास ते आपल्या नातेवाईकांसह कलानगर गावातील सर्वे नं. २९, हिस्सा नं. १४/१५ या त्यांच्या जुन्या जागेवर गेले होते. त्यावेळी अशोक इवलेकर यांच्या महिला कामगार काजूच्या झाडावरील बिया काढत असल्याचे दिसून आले. यावर पवार यांनी हरकत घेत बिया काढू नका, असे कामगारांना सांगितले.

यानंतर सुमारे ११.३० वाजण्याच्या सुमारास अशोक तुकाराम इवलेकर, प्रकाश तुकाराम इवलेकर, उदय तुकाराम इवलेकर, ऋतिक प्रकाश इवलेकर व नंदा प्रकाश इवलेकर हे पाचही जण त्या ठिकाणी आले. त्यांनी कामगारांना बिया काढण्यास हरकत घेतल्याच्या रागातून पवार व त्यांच्या कुटुंबीयांना शिवीगाळ करून धक्काबुक्की केली. तसेच गाडीखाली घालून ठार मारण्याची धमकी दिल्याचे तक्रारीत नमूद करण्यात आले आहे.

या तक्रारीच्या आधारे संबंधित पाच संशयितांविरोधात दापोली पोलीस ठाण्यात अनुसूचित जाती-जमाती अत्याचार प्रतिबंधक अधिनियम, भारतीय न्याय संहिता तसेच मुंबई पोलीस कायद्यानुसार गुन्हा दाखल करण्यात आला आहे.

या प्रकरणाचा पुढील तपास खेडचे उपविभागीय पोलीस अधिकारी शैलेश सणस करीत आहेत.