दापोली : महाराष्ट्र राज्य मार्ग परिवहन महामंडळ (एसटी) च्या दापोली आगारातील गलथान कारभाराचा आणखी एक धक्कादायक प्रकार समोर आला आहे. बोरिवली–दापोली मार्गावर धावणारी ‘शिवाई’ बस अचानक बंद पडल्याने ती विसापूर येथून टोचन करून आगारात आणावी लागली. या घटनेमुळे प्रवाशांना मोठा मनस्ताप सहन करावा लागला.

मिळालेल्या माहितीनुसार, बोरिवली–दापोली या महत्त्वाच्या मार्गावर धावणारी शिवाई बस नियमित प्रवासी वाहतूक करत असताना विसापूर परिसरात अचानक बंद पडली. बसमध्ये प्रवास करणाऱ्या प्रवाशांना मध्येच उतरावे लागले. काही प्रवाशांनी पर्यायी वाहतुकीचा आधार घेतला, तर काहींना बराच वेळ रस्त्यावर थांबावे लागले.

यानंतर संबंधित बस टोचन करून दापोली आगारात आणण्यात आली. मात्र, वारंवार एसटी बस बंद पडण्याच्या घटना घडत असल्याने प्रवाशांमध्ये तीव्र नाराजी व्यक्त होत आहे. एसटी प्रशासनाने बसची योग्य देखभाल आणि दुरुस्ती न केल्यामुळे अशा घटना घडत असल्याचा आरोप प्रवाशांकडून करण्यात येत आहे.

दापोली आगारातून सुटणाऱ्या अनेक बस जुन्या व तांत्रिकदृष्ट्या कमकुवत झालेल्या असून, त्यांची वेळेवर तपासणी होत नसल्याची तक्रार आहे. यामुळे प्रवाशांच्या सुरक्षेचा प्रश्न निर्माण झाला आहे. एसटी ही ग्रामीण भागातील नागरिकांची जीवनवाहिनी मानली जाते, मात्र अशा प्रकारच्या घटनांमुळे प्रवाशांचा विश्वास डळमळीत होत आहे.

प्रवाशांनी एसटी प्रशासनाने या प्रकाराची गंभीर दखल घेऊन बसची नियमित तपासणी करावी, तसेच सुरक्षित व विश्वासार्ह सेवा उपलब्ध करून द्यावी, अशी मागणी केली आहे.