दापोली (वार्ताहर) : अंमली पदार्थ विरोधी मोहिमेअंतर्गत दापोली पोलिसांनी जालगाव पांगारवाडी येथे कारवाई करत गांजाचे सेवन करणाऱ्या एका ५१ वर्षीय व्यक्तीला रंगेहात पकडले आहे. राजेंद्र अनंत घाग (रा. पांगारवाडी, जालगाव, ता. दापोली) असे ताब्यात घेण्यात आलेल्या व्यक्तीचे नाव असून त्याच्याविरोधात अंमली पदार्थ विरोधी कायद्यांतर्गत गुन्हा दाखल करण्यात आला आहे.

मिळालेल्या माहितीनुसार, ४ मार्च २०२६ रोजी सायंकाळी सुमारे साडेपाच वाजण्याच्या सुमारास दापोली पोलीस ठाण्याचे पोलीस कॉन्स्टेबल बळीराम बालाजी चोंडे व त्यांच्या पथकाला पांगारवाडी परिसरात एक व्यक्ती अंमली पदार्थाचे सेवन करत असल्याची गोपनीय माहिती मिळाली होती. या माहितीच्या आधारे पोलिसांनी पांगारवाडी येथील घर क्रमांक ४५३ येथे छापा टाकला.

या छाप्यात आरोपी राजेंद्र घाग हा गांजा या अंमली पदार्थाचे सेवन करत असताना पोलिसांना रंगेहात आढळून आला. पोलिसांनी त्याला ताब्यात घेऊन चौकशी केली असता त्याने गांजाचे सेवन केल्याची कबुली दिल्याची माहिती पोलिसांनी दिली.

या प्रकरणी दापोली पोलीस ठाण्यात आरोपीविरुद्ध अंमली पदार्थ विरोधी कायदा १९८५ (NDPS Act) अंतर्गत कलम ८(अ) व २७ अन्वये रजिस्टर क्रमांक ३१/२०२६ प्रमाणे गुन्हा दाखल करण्यात आला आहे. ही कारवाई रात्री सुमारे ११.३० वाजण्याच्या सुमारास पूर्ण करण्यात आली.

दरम्यान, दापोली परिसरात अंमली पदार्थांच्या वाढत्या प्रकारांना आळा घालण्यासाठी पोलीस प्रशासनाने कडक पावले उचलली असून अशा प्रकारच्या कारवाया पुढेही सुरू राहतील, असा इशारा पोलिसांनी दिला आहे. या प्रकरणाचा पुढील तपास पोलीस पथकाकडून करण्यात येत आहे.