नवी दिल्ली (प्रतिनिधी) : आंतरराष्ट्रीय परिस्थितीचा परिणाम आता भारतातही जाणवू लागला असून घरगुती आणि व्यावसायिक एलपीजी गॅस सिलिंडरच्या दरात वाढ करण्यात आली आहे. १४.२ किलो वजनाच्या घरगुती गॅस सिलिंडरच्या किमतीत ६० रुपयांची वाढ करण्यात आली असून १९ किलो वजनाच्या व्यावसायिक सिलिंडरच्या दरात ११५ रुपयांची वाढ करण्यात आली आहे. हे नवे दर आज ७ मार्चपासून देशभरात लागू झाले आहेत.

या दरवाढीमुळे सर्वसामान्य नागरिकांच्या खिशाला मोठा फटका बसणार असून महागाईच्या पार्श्वभूमीवर घरगुती बजेटवरही परिणाम होण्याची शक्यता व्यक्त केली जात आहे. एप्रिल २०२५ पासून गॅस सिलिंडरचे दर तुलनेने स्थिर होते; मात्र या वाढीमुळे ग्राहकांवर अचानक आर्थिक ताण निर्माण झाला आहे.

दरम्यान, हॉटेल, रेस्टॉरंट्स तसेच लहान व्यावसायिक आस्थापनांसाठी वापरल्या जाणाऱ्या १९ किलोच्या व्यावसायिक सिलिंडरच्या किमतीत ११५ रुपयांची वाढ झाल्याने या व्यवसायांवरही त्याचा परिणाम होणार आहे. मुंबईमध्ये व्यावसायिक सिलिंडरचा दर १७२०.५० रुपयांवरून वाढून १८३५ रुपयांपर्यंत पोहोचला आहे. त्यामुळे हॉटेलमधील खाद्यपदार्थांच्या किमती वाढण्याची शक्यता वर्तवली जात आहे.

दरम्यान, सोशल मीडियावर पेट्रोल-डिझेलच्या तुटवड्याबाबत पसरत असलेल्या अफवांवर केंद्र सरकारने स्पष्टीकरण दिले आहे. केंद्रीय पेट्रोलियम मंत्री हरदीप सिंग पुरी यांनी देशात इंधनाचा कोणताही तुटवडा नसल्याचे स्पष्ट केले आहे. पुरवठा साखळी सुरळीत सुरू असून भारताकडे कच्चे तेल व एलपीजीचा पुरेसा साठा उपलब्ध असल्याचेही त्यांनी सांगितले.

तसेच इंडियन ऑईल कॉर्पोरेशननेही नागरिकांना घाबरून पेट्रोल पंपांवर गर्दी करू नये, असे आवाहन केले आहे. अमेरिकेसह इतर देशांकडून एलपीजीची आयात सुरू असून देशात इंधन पुरवठा सुरळीत असल्याची माहिती देण्यात आली आहे.