दापोली (वार्ताहर) : जागतिक महिला दिनाच्या निमित्ताने दापोली येथे महिलांसाठी मोफत आरोग्य तपासणी शिबिराचे आयोजन करण्यात आले आहे. महाराष्ट्र शासनाच्या महसूल व वन विभागाच्या वतीने तसेच रत्नागिरी येथील सहाय्यक आयुक्त कार्यालयाच्या सहकार्याने हा उपक्रम राबविण्यात येत आहे.

या शिबिरामध्ये महिलांसाठी गर्भाशय मुखाच्या कर्करोगाच्या निदानासाठी एचपीव्ही (HPV) चाचणी मोफत करण्यात येणार आहे. यासोबतच महिलांमध्ये आरोग्याबाबत जनजागृती करण्यासाठी विशेष आरोग्य शिबिराचे आयोजनही करण्यात आले आहे.

हे शिबिर दि. ८ मार्च रोजी सकाळी १० ते दुपारी २ वाजेपर्यंत तहसीलदार कार्यालय, दापोली येथे आयोजित करण्यात आले आहे. या उपक्रमाचा मुख्य उद्देश महिलांमध्ये गर्भाशय मुखाच्या कर्करोगाबाबत जनजागृती करणे तसेच वेळेत तपासणी करून आरोग्याचे संरक्षण करणे हा आहे.

दापोली परिसरातील महिलांनी या मोफत तपासणी शिबिराचा लाभ घ्यावा, असे आवाहन आयोजकांकडून करण्यात आले आहे. तसेच जागतिक महिला दिनानिमित्त सर्व महिलांना शुभेच्छाही देण्यात आल्या आहेत.