पेण (प्रतिनिधी) : मुंबई-गोवा महामार्गावर पेण तालुक्यातील बुर्डी गावाजवळ गुरुवारी (दि. ६ मार्च) सायंकाळी झालेल्या भीषण अपघातात दोन जणांचा जागीच मृत्यू झाला. भरधाव कारने रस्ता ओलांडणाऱ्या दोघांना जोरदार धडक दिल्याने ही दुर्घटना घडली.

मिळालेल्या माहितीनुसार, सायंकाळी सुमारे ७.३५ वाजण्याच्या सुमारास बुर्डी बसस्टॉपसमोर हा अपघात घडला. लाल रंगाची ब्रेझा कार (क्र. MH 06 BU 4664) चालकाने आपली कार अतिवेगाने व बेदरकारपणे चालवत गोवा दिशेकडील लेनवरून जात असताना एल अँड टी कॉलनी, सालींदे येथून बुर्डी गावाकडे रस्ता ओलांडत असलेल्या दोघांना जोरदार धडक दिली.

या अपघातात प्रदीप कुमार साहब सिंग (वय ३३) व अजय कुमार रामप्रकाश (वय ३१) या दोघांचा जागीच मृत्यू झाला. दोघेही सध्या एल अँड टी कॉलनी, सालींदे (ता. पेण) येथे राहत होते असून मूळचे उत्तर प्रदेशातील फिरोजाबाद येथील असल्याची माहिती मिळाली आहे. अपघातात त्यांच्या डोक्याला तसेच हातपायांना गंभीर दुखापत झाल्याने त्यांचा घटनास्थळीच मृत्यू झाला.

या प्रकरणी तक्रारदार सुनील शंकर पाटील (पोलीस पाटील, सालींदे) यांच्या फिर्यादीवरून वडखळ पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.

या अपघातामुळे परिसरात हळहळ व्यक्त करण्यात येत असून महामार्गावरील वेगवान वाहनांमुळे अपघातांचे प्रमाण वाढत असल्याची चिंता स्थानिक नागरिकांनी व्यक्त केली आहे.