गुहागर (प्रतिनिधी – मंगेश जाधव) : गुहागर पंचायत समिती निवडणुकीनंतर भाजप–शिवसेना युतीची सत्ता स्थापन झाल्यानंतर सभापती व उपसभापतीपदी कोणाची निवड होणार याबाबत राजकीय वर्तुळात मोठी उत्सुकता होती. अखेर शिवसेनेकडून प्रणव पोळेकर यांची सभापतीपदी तर भाजपकडून निलेश सुर्वे यांची उपसभापतीपदी बिनविरोध निवड करण्यात आली.

गुहागर पंचायत समिती निवडणुकीत शिवसेनेने लढविलेल्या ६ जागांपैकी ५ जागांवर विजय मिळवला होता, तर भाजपने लढविलेल्या ४ पैकी सर्व ४ जागांवर विजय मिळवत आपली ताकद दाखवून दिली होती. त्यामुळे युतीच्या समीकरणानुसार सभापतीपद शिवसेनेकडे आणि उपसभापतीपद भाजपकडे जाणार हे जवळपास निश्चित मानले जात होते. मात्र या पदांवर नेमके कोण विराजमान होणार याबाबत विविध तर्क-वितर्क रंगले होते.

अखेर शिवसेनेकडून पालकमंत्री उदय सामंत यांचे निकटवर्तीय प्रणव पोळेकर यांच्या नावाची सभापतीपदासाठी अधिकृत घोषणा करण्यात आली. तर उपसभापतीपदासाठी भाजपकडून माजी आमदार डॉ. विनय नातू यांचे विश्वासू सहकारी निलेश सुर्वे यांच्या नावाची घोषणा करण्यात आली.

या निवडीच्या वेळी माजी आमदार डॉ. विनय नातू, नवनियुक्त पंचायत समिती सदस्य तसेच शिवसेना-भाजपचे पदाधिकारी व कार्यकर्ते मोठ्या संख्येने उपस्थित होते. निवडणूक प्रक्रिया गुहागरचे तहसीलदार परिक्षित पाटील यांनी निवडणूक अधिकारी म्हणून पार पाडली.

नवनियुक्त सभापती व उपसभापतींचे सर्व स्तरातून अभिनंदन करण्यात येत असून, गुहागर तालुक्याच्या विकासासाठी दोघेही प्रभावी काम करतील अशी अपेक्षा व्यक्त केली जात आहे.