गुहागर (प्रतिनिधी – मंगेश जाधव): गुहागर तालुक्यातील तळवली येथील भेळेवाडीमध्ये ग्रामदेवता आई श्री सुकाई देवी यांच्या पालखी सोहळ्याच्या पार्श्वभूमीवर रंगपंचमी तसेच जागतिक महिला दिन मोठ्या उत्साहात साजरा करण्यात आला. वाडीतील ग्रामस्थांनी प्रथमच एकत्र येत हा उपक्रम आयोजित केल्याने कार्यक्रमाला विशेष उत्साहाचे वातावरण लाभले.

रंगपंचमीच्या निमित्ताने ग्रामदेवता श्री सुकाई देवी यांची पालखी वाडीतील प्रत्येक घरी नेण्यात आली. त्यानंतर सायंकाळी पारंपरिक पद्धतीने पालखी मिरवणूक काढण्यात आली. पालखी नाचवत व रंगांची उधळण करत ग्रामस्थांनी रंगपंचमी जल्लोषात साजरी केली.

रात्री उशिरा वाडीतील तसेच उपस्थित महिलांचा सन्मान करण्यात आला. यावेळी महिलांचे कुटुंब व समाजातील महत्त्व, त्यांचा सन्मान आणि आदर राखण्याची गरज याविषयी मार्गदर्शनपर विचार मांडण्यात आले. महिलांसाठी विविध खेळांचे आयोजन करण्यात आले असून विजेत्यांना बक्षिसे देऊन गौरविण्यात आले.

याच कार्यक्रमाच्या निमित्ताने अंगणवाडी ते नववीपर्यंत शिक्षण घेणाऱ्या होतकरू विद्यार्थ्यांना शालेय साहित्याचे वाटप करण्यात आले. वाडीतील पदवीधर तसेच विविध क्षेत्रात कार्यरत असलेल्या तरुणांनी विद्यार्थ्यांशी संवाद साधत शिक्षणाचे महत्त्व पटवून दिले आणि पुढील वाटचालीसाठी त्यांना प्रेरणा दिली.

हा संपूर्ण कार्यक्रम आनंदी व उत्साही वातावरणात पार पडला. कार्यक्रमाच्या यशस्वी आयोजनासाठी भेळेवाडीतील ग्रामस्थ व महिला मंडळींनी मोलाचे सहकार्य केले.